Shillong, K’Lyngkot 15 : Ka Chairperson jong ka All India Trinamool Congress (AITC) ka Mamata Banerjee kan wan biang sha Meghalaya ha ka 18tarik mynta u bnai ban ïalap elekshon ha North Garo Hils District.
Kane kadei ka sien kaba ar ba katei ka hehduh jong ka Trinamool Congress kan wan sha ka jylla kaban sa jied shen ïa ki nongmihkhmat kiba thymmai.
Ïa katei ka nongïalam jong ka TMC yn synran lang ruh da u National Secretary jong ka party, u Abishek Banerjee.
Nalor ki nongïalam jong ka party, kiban poi sha katei ka jingïalang kin kynthup ruh naduh u MP ka AITC, ba dei ruh u nongïalam ki MP ha Rajya Sabha, u Derek O’Brien, nangta u nongpeit ïa ka Meghalaya, u Manas Bhunia, u President ka AITC Meghalaya Bah Charles Pyngrope bad ruh u nongïalam ka Liang Pyrshah u Dr. Mukul Sangma nalor kiwei kiwei, ong ka kyrwoh ba phah na katei ka party ha kane ka sngi U Blei.
Lah ba kdew hangne, ba dang ha u bnai ba la dep, ka Mamata Banerjee ka la wan sha kane ka jylla bad pyllait paidbah ruh ïa ka skim jingkyrshan pisa na bynta ki longkmie kaba la ai kyrteng ka ‘We Card’, kaba mynta ka la ïoh ïa ka jingpynrung kyrteng haduh kumba lai lak tam.
