Ngam artatien shuh ba ki paidbah ka Pynursla kin phah ïa nga sha assembly mynta ka kynti : Neru Suting

Shillong, K’lyngkot 15: U kyrtong jong ka Congress na Pynursla constituency u Bah Neru Suting ha ka jingïakren bad u Mawphor u la pynpaw ïa ka jingsngew skhem ba ki paidbah ka Pynurla constituency kin phah ïa u sha Assembly kum u MLA ka thaiñ ha kane ka kynti kaba mynta namar ki la sngewthuh shai ba ka jingangnud bad ka thong kaba ki khmih mynta na u MLA ba la jop 20 snem tam ki shu kut tang ha suin.
Haba kren bad u Mawphor u Bah Neru u ong ba kane ka constituency kaba u Symbud Myntri Rangbah ka jylla ka dang shadien shibun eh khmata ha kaba ïadei bad kaei kaba ki nongrep ki khmih lynti na u kum u nongmih khmat ka thaiñ.
“Lada phi leit sha ki shnong jong ka Pynursla kiba bun hi ki nongshong shnong ki dei kiba im ja na ka kam rep kwai bad tymmpew hynrei sngew pangmet ban ïathuh ba kine ki nongrep kim ju ïoh jingkyrshan na ka sorkar new u MLA kumno ban pynbha ïa ka rukom rep ban kyntiew ïa ka ïoh ka kot jong ki,” u la ong.
U la ong ba ka jingpynpoi um sha ki wahli (jaka rep tympew) wat la kiba jngai katto katno ruh ki long ki nongrep kim ju ïoh jingkyrshan na ka sorkar hynrei kin hap kit khlieh hi beit ban pynpoi um lyngba ka shyngiar wat ka dei kaba suk ba ka sorkar kan ïarap ïa ki ban pynpoi um sha ki jaka rep.
U la ong ba ka iew ka hat u kwai ruh katba nang mih ki snem ka nang hiar bad kum juh ka jinsei soh lada peit tang ha kine ki khyndiat snem kiba la leit.
Haba jubab balei ba u ïakhun noh na ka congress ym shuh na ka UDP kaba u la ïakhun ha u 2018 kaba u shu rem salit, u Bah Neru u la ong ba ka jingbym ïakhun shuh jong u na ka UDP ka dei namar u la lap ïa ki buit poh arsap kiba kane ka party ka don bad buh shadien ïa ka jingdonkam ki paidbah.
“Ka UDP ka dei tang ka rongser ka NPP bad ha ka jingpeit jong nga lei lada kine ki party kin wan biang ha ka bor ngin shah rong umsat lut lyngba ki policy pyrshah paidbah bad nongrep jong ki bad nga nud ban ong ba kaei kaba kane ka sorkar hi ka leh ka dei beit kaba la leh da ka jingïatip bad sngewthuh jingmut lang hapdeng ka UDP bad NPP,” u la ong.
Haba la kylli halor ka jingïaid ka khubor ba ka jingïakhun jong u ka dei namar ba u Bah Prestone u pynïeng namar u tieng eh ïa u Bah Anthony Kongwang u kyrtong ka UDP, u Bah Neru u la ong ba kane ka dei tang ka buit shukor jong kiwei pat ki party ban pynduh jingshaniah na u paidbah ka Pynursla.
“Nga ruh nga ïohsngew ba ka pur bha kane ka khana bad don lei kiba ong ba hadien ka elekshon 2018 nga shitom haduh ba ym long shuh hynrei lyngba kane ka khubor nga kwah ban kren shai ba nga koit nga khaliñ bad nga ïakhun ruh namar ka jingsngew khia ïa ka thaiñ ym kumba la kynnoh da mano re ba la pynïeng ïa nga da u MLA ba mynta,” u la ong.
Haba kylli ïa ka daw ba u jied ïa ka Congress ka party kaba ym don shuh wat tang uwei u MLA ruh, u Bah Neru u ong ba dei ki nongrim jong ka party ka ïeng kaba la pynïapmat ba un lei ïakhun noh na kane ka party.
“Ka Congress ka dei ka jhad titanic kaba thymmai bad ki captain ruh ki dei kiba thymmai suda bad dei na kane hi ka daw ba nga jied ïa ka congress ban ïa kaba ïai neh bad ka party rongser jong ka NPP,” u la ong.