Shillong, Kyllalyngkot 14: Ka long ka burom ïa ka jylla Meghalaya ha kaba mynta ka sngi la lah ban plie ïa ka “Court Yard Marriott Hotel” ha Jail Road, kane ka dei ka hotel kaba heh tam hapoh ka thaiñ shatei lam mih ngi ka Ri India.
Haba plie ïa kane ka Hotel u myntri rangbah ka jylla u Conrad K Sangma la ong ba kane ka dei ka burom ïa ka jylla kaba rakhe ïa ka jingdap 50 snem ka jylla, da ka jingplie ïa kane ka jaka sah kan kyntiew ïa ki kam jngohkai pyrthei ha ka jylla.
Kane ka jaka kaba la shna ïa kane ka Hotel ka dei ka ophis jong ka Shillong Municipal Board, ïa ka ophis jong ka la rah sha kiïiing bala shna ban pynsah ïa ki briew kiba sah ha Themetor bad mynta la pynkynriah ïa ka ophis jong ka SMB na katei ka jaka.
Hapoh kane ka sorkar MDA kaba la ïalam da u Conrad K Sangma kum u myntri rangbah ka jylla, la lah ban pyndep ïa ki ar tylli ki Hotel kiba la sah teng la bun snem, ka Vivanta kaba la sdang tei ha u snem 1986 la lah ban plie mynta bad ïa ka Marriott kaba la ai kyrteng “Court Yard” la lah ban plie ha kane ka sorkar MDA kaba mynta.
