Nongstoiñ, Jymmang, 27: Ka ïew Rambrai ka dei kaba hap ha ka jingpeit jingkhmih jong ophis jong u Syiem ka hima Rambrai, ka long ruh kum ka thymmei jong ka khaïi ka pateng, ïa die ïa thied bad ka siew ka tda jong ki paitbah nongshong shnong jong ka thaiñ Rimen baroh kawei.
Watla katei ka ïew ka dei kaba la heh bha, hynrei kaba lyngngoh ka long ba ïa baroh ki jaboh jabaiñ kiba la pynkhuid, la shu lum thup harud ka ïew ha ka jaka ba ki nongshong die jingdie ki shong madan bad ki don ruh ïing ki sem jong ki nongshong shnong kiba don sawdong katei ka jaka.
Ha ka sngi saitjaiñ ba la dep ki nongïalam ka FKJGP Rambrai circle, ki la leit ban ïakynduh ïa u bah Order Syiem u ba dei u Syiem ka hima Rambrai, ban ïakren bad pan jingshai na u halor ka jingpynlang ïa ki jaboh jabaiñ harud ïew ha syndah jong ki jaka die jingdie bad ki dukan.
Ka seng ka kyntu ïa u bad ka ophis ba ki dei ban pynkhuid noh ïa kitei ki jaboh, namar ba ka ktah haduh katta katta ïa ki nongshong die jingdie bad ki longïing kiba don sawdong katei ka jaka.
Ha katei ka sngi ki nongïalam ka FKJGP ryngkat bad u bah Maïan Nongphud sordar jong ka shnong ïew Rambrai, ki la leit ban jurip ïa katei ka jaka bad la lap ba bun ki nong shong die madan ki shu siang da ki jaiñ jri halor ki jaboh jabaiñ ban die ïa ki mar jong ki.
U bah Jiedstarland Lyngkhoi president ka FKJGP Rambrai circle haba ïakren bad u nongthoh khubor, u la ong ba na ka liang ka seng ka sngewkhia haduh katta katta ïa ka jingbym shimkhia jong u Syiem halor ka khuid ka suba jong ka ïew.
Utei u nongïalam ka seng u la ong ba halor ka jingbym shimkhia jong u Syiem ïa ka khuid ka suba hapoh ïew Rambrai, ka seng kan sa leit ban buh da ka jingthoh sha u Deputy Commissioner jong ka West Khasi Hills u ba dei ruh u Chiarman jong ka Swaach Bharat Mission, ba un tuklar lem halor ka jingsyrtap ki jaboh jabaiñ ha rud ka ïew Rambrai.
U bah Maïan Nongphud sordar jong ka shnong u la ong ba ka shnong kam sngew tynnad satia ïa ka jingpynlong jaka theh ñiut ha katei ka jaka. Hynrei kam lah ban leh ei ei namar ba katei ka ïew ka hap hapoh ka jingpeit jong u Syiem.
Nalor kata u la ong ba ka jinglum thup ïa ki jaboh jabait ha katei ka jaka ka la ktah haduh katta katta ym tang ïa ki nongdie jingdie, hynrei ïa ki nongshong shnong kiba shong sawdong katei ka jaka. U la ong ruh ba ha ki aïom ba ka rang ryngkhiang haba ka jur ka lyer ka kit ïa ki jaboh kum ki plasik, ki kot jot bad kiwei kiwei haduh phyllaw jong ki ïing shong briew.
Utei u sordar u la kyntu ruh ïa u Syiem ba un shimkhia ha ka ban wad da kawei pat ka jaka kaba kham pajih na ïew bad napoh ka shnong ban pynlong kum ka jaka bret ñiut. Lada u shem jingeh ka shnong ka long kaba la kloi ban ïatreilang, na ka bynta ban wan rah ïa ka jingkhuid jingsuba kumba long kiwei pat ki jaka ïew bad ki shnong ki thaw.
Ha katei ka sngi la ïoh ban ïakren ruh bad ki die jingdie kiba shong dukan sawdong katei ka jaka, ha kaba ki la ong ba haba ki shong die jingdie ka jingsma ka long ka bym lah ban ong hynrei ki shu shong da ka jingbym banse namar ba ki ïoh jaka shawei pat.
