Nongstoiñ, Jymmang 27: Ki nongshong shnong ka Langdongdai bad ka Mawlieh Bazaar Committee, ha ka sngi ba ar 27 tarik Jymmang ki la ïoh kem ïa lai ngut ki nongdie bad nongkhaïi kyiad pyrsi kiba dei na Assam.
Ïa kine ki briew la ïoh kem na ka iew jong ka shnong Langdongdai, ka shnong ha khappud jong ka West Khasi Hills District.
Katkum ka jingïathuh ki nongkitkam shnong ka Langdongdai ha u nongthoh khubor, la ong ba uwei na kine u dei u Withar Nachugre u ba dei u sordar shnong ka shnong Pormawleiñ bad ar ngut pat ki dei ki bar jylla kiba wan die jingdie hapoh Iew Langdongdai.
Hadien ka jingtian bishar, ka Dorbar Shnong ka la rai ban khang noh shisyndon ïa ka jingwan ki bar jylla ban die jingdie ha ka Iew shnong nangne shakhmat.
