Syllad ka ‘eriong Sitrang ha West Khasi Hills District, julor u kba, ki ïing briew bad ki jingthung jingtep
Nongstoiñ, Risaw, 25: Ka ‘eriong ‘erngit Sitrang ryngkat u ‘lapbah kaba la neh mynta la ar sngi kynthih, ka la syllad naphang ïa u kba bad ki jingthung jingtep, ha kiba bun ki shnong kiba don ha West Khasi Hills, kat haduh ba ka jingjulor ka la ktah shisha ïa ki nongrep, kiba mynta sa tang katto katne ban pynkhreh ïa ka aiom ot.
Ym tang ki jingthung jingtep, hynrei la ïoh khubor ruh ba ki la don kumba hynriew tylli ki ïing kiba don ha ki thaiñ nongkyndong kiba la shah ktah na ka jingjur ka lyer. Kine ki kynthup naduh ka ïing u bah Kyrshanbor Langrin, Ramsing Syiemlieh, Merry Thongni, Deicy Nongsiej bad Theoris Nongsiej. Kine ki ïing ki dei ka ïing kaba don ha ka shnong Nongkyna Mawshynrut Civil Sub Division, ha kaba ka lyer ba jur ryngkat u slap bah, ka la ïoh ban jynrat ïa ki katto katne ki bynta jong katei ka ïing, tangba ym shym la don ba mynsaw.
Shuh shuh, la ïoh khubor ba ki don kiwei de ki ïing ha ka thaiñ kiba la julor, nalor ki jingthung jingtep kum u pathaw bad kiwei kiwei ki jait jhur ba bun jait ki la julor jur ha thaiñ Mawshynrut. Tangba haduh ba thoh ïa kane ka khubor ym pat lah satia ban pynthikna ïa ka jingjulor bad katno ki shnong ba la shah ktah na kane ka ‘eriong.
Na ka liang u Secretary ka Hills Farmers Union West Khasi Hills District u Bah Lumlang Kharsyiemlieh, haba pyntip ha u nongthoh khubor hynne ka sngi, u la ong ba ka la long shisha kaba isynei ïa ki pynthor kba, namar u slap bah bad lyer ba jur, u la syllad bad rat lut naphang.
U la ong ba na ka liang ka Hill Farmer Union (HFU) West Khasi Hills District, ka pynpaw ïaka jingdiaw haba ïohi ïa ka jingjaw ummat ki para nongrep ba ha kine ar sngi ka jur eh ka shlei um bad ka eriong. U la ong ba u slap bad ka lyer ka la pynjot eh ïa ki kba, ki biskot, ki phan bad kiwei. Kane ka la ktah eh kylleng ka West Khasi Hills, ba kynthup ïa ki Ïing jong ki nongrep.
U la ong ba ka jingshah pynjulor eh ka dei ha ka thaiñ Umyiap bad jan baroh hi pynthor thung kba, ki la shah ktah ha kane ka jingjia. Ka HFU ka phah ka jingsngewlem bad duwai u Blei un ïarap pat ha kawei ka liang. Ka seng ka kyrpad ruh ïa ka sorkar ban ïarap lem ban wan jngoh bad ban ïarap kyrkieh lyngba ka Relief Fund ban leh kloi de, namar ka la ktah shikatdei eh ïa ki Nongrep.