Khliehriat Risaw 25: Ki pulit jong ka East Jaiñtia Hills District, hynnin ka sngi ki la kem noh ïa u Suresh Bareh, 21 snem kyrta halor ka jingkynnoh ba u la leh beijot bad bat bor ïa kawei ka hep rit kaba dang 9 snem kyrta kaba dang dei ruh ka pyrsa kur jong u bad kane ka la jia myn ha ka 23 tarik mynta u bnai ha kawei ka shnong ha East Jaiñtia Hills District.
La ong ba katei ka hep rit ka dang don mynta hapdeng ka jingshah surmar ha CHC Khliehriat, ki thymmei khubor ki ïathuh shuh shuh bad katkum ka jingiathuh jong ka kmie jong katei ka heprit, la ong ba utei u runar u la leh ïa kane ka kam bymman dei ha ka por kumba 5 ne 6 baje janmiet katba katei ka hep rit ka dang wan thied jingthied na dukan, tang shu ïoh jingtip halor kane, mar mar ki pulit ki la thwet bad hynnin ka sngi ki la kem noh ïa u Suresh Bareh uba la pyrshang ban phet rieh na kti ki pulit.
Ha kaba ïadei bad kane, ka la ujor ejahar pyrshah ïa utei u runar ha Women Police Station Khliehriat, ha ka case No 34(10)20222 bad la pynngat ïa u hapoh ki kyndon aiñ 323/307/376 AB/376(2)(f)IPC r/w Sec. 5(m)(n)/6 POCSO Act bad kat haduh mynta ka jingtohkit ka dang ïaid sha khmat.
