Ym don ka jingjia ba sngewsih na ka eriong SITRANG ha Ri Bhoi

Julor tang ki Kba, ki skul kin plie biang, ong u DC Ri Bhoi

0

Nongpoh, Risaw 25: Kumba na ka liang u Deputy Commissioner ka Ri Bhoi u la pynmih ïa ka hukum ba hap ban ban shim ïa ki lad jingïada bad ban peitngor na ka eriong SITRANG kumba la pynbna da ka tnad Indian Meteorology Department ba ka lah ban don ka jingktah na katei ka eriong, ha kaba la khang ruh wat ki skul pule naduh Nursery haduh Class-X ha Ri Bhoi District mynta ka sngi bad katkum ka jingioh lum jingtip pat ba ha kane ka sngi wat lada jur u lapbah bad khriat ka suiñ bneng, hynrei kam shym la don kano kano ka jingjia ba sngewsih.
Ïa kane la ïathuh da u Deputy Commissioner ka Ri Bhoi sha u Nongthoh Khubor hadien ba la buddien halor kane ka jingmana ba la buh lypa na ka jingdon katei ka eriong SITRANG.
Haba la ioh ban ïa kren bad u Deputy Commissioner ka Ri Bhoi, u Arpit Upadhayay, u la ïathuh ba mynta ka sngi kata ka 25 tarik ba la dep ban mana ba hap ban long kiba peitngor na ka jingdon katei ka eriong SITRANG kaba lah ruh ban ktah ha ki katto katne ki bynta jong ka Meghalaya bad haduh ka janmiet kam shym la don kano kano ka jingjia ba sngewsih kaba ktah ïa ki nongshong shnong ka Ri Bhoi District.
U la ïathuh ruh ka don tang katto katne ki jaka ba shah pynjulor u kba ha ka thaiñ Bhoirymbong na ka jingpaswut ka eriong bad lait na kane kam don kano kano ka jingjia ba mynsaw ne ktah ïa ka jingim ki nong shong shnong ka Ri Bhoi.
Kumba u la dep ban pynmih ïa ka hukum ba ki skul kin khang ha ka 25 tarik, mynta ka sngi na ka daw ka jingdon katei ka eriong SITRANG bad mynta ka janmiet pat u la pyntip ba kam don shuh kano kano ka jingpynmih hukum bad baroh ki skul kumba la pynmi hukum naduh Class Nursery haduh Class-X kin plie biang ha ka 26 tarik u Risaw bad lada don kino ki jingpynbna ka bor district kan sa pynmih ïa ka jingpynbna na ka bynta ka jingtip lang jong ki paidbah, u la ong.
Ha kawei ka bynta, na ka daw ka jingmana lypa na ka jingdon kane ka eriong SITRANG katkum ka jingioh lum jingtip u Nongthoh Khubor, baroh ki skul ki la khang khyrdep mynta ka sngi bad bun ki jaka paidbah ki la kynjah namar ba ka jinglong jingman ka suiñ Bneng ki paidbah ki la duna ban mih sha jaka paidbah ne sha ki iew ki hat bad ïa kane la sakhi ruh wat ka sor Nongpoh mynta ka sngi ki duna bha ki paidbah ba leit ba wan haba ïa nujor bad kiwei kiwei ki sngi kiba long kumba ju long man la ka por.

Leave A Reply

Your email address will not be published.