La palat 46 snem wat tang ka District Auditorium ruh ym pat don: Samla D.Sun

Nongstoiñ, Risaw, 25: Ka WKSU seng kmie ka dawa na ka sorkar jylla lyngba ka Department of Arts & Culture, ba kan pynïoh noh la ka jong ka building ba pura na ka bad ban pynlong ïa ka District Library ba pura ha Nongstoiñ.
Ka sorkar ka dei ban pynbiang pura ïa baroh ki jingdonkam ha katei ka tnad jingbuh jingsad ha kaba ïa dei bad ki kot pule. Ban pynkhlaiñ ha ka rukom pynbiang bad pyndap ïa ki kot pule ha katei ka tnad sam jingnang jingtip, lyngba ki thup jong ki kot pule kiba long katkum ka jingsam jingtip kaba long kat kum ka juk mynta.
Ym tang ha ki kot pule ha katei ka tnad, ka sorkar lyngba ka Department jong ka Arts & Culture, ka dei ban pyntreikam noh da ki kor ki bor Internet ka juk mynta hapoh District Library Nongstoiñ, na ka bynta ban ïoh jingtip khambun shuh na ka bynta kino kino ki jingsam jingtip ba kham phylla sha ki samla pule jong ka thaiñ.
Dei ban buh da ki kyndon aiñ ïa ka jingpyndonkam ïa ka internet, khnang ba ki samla pule kin ym pyndonkam bakla ïa kino kino ki jingsam jingtip lyngba ki kor ki bor ka juk stad mynta.
Ka seng ka dawa na ka sorkar jylla lyngba u myntri ba dei peit ïa ka tnad Arts & Culture u Bah A.L Hek, ba nalor ka jingdawa ban don noh la ka jong ka building ba pura bad ruh ban pynlong noh kum ka District Library ba pura ha Nongstoiñ, ka West Khasi Hills ka la don kam kyrkieh ïa ka District Auditorium.
“Lada ka sorkar ka shimkhia shisha ban pynïoh ïa kine ki ar tylli ki mat jingdawa, ka thaiñ West Khasi Hills kan sa kiew sted ha ka pule puthi bad kin mih bun ki riew stad riew shemphang ha kane ka thaiñ. Ym tang kata wat na ka liang ka sorkar ruh kan sah ïoh shibun ka khajna lada ka kloi ban leh bad ka kyrshan ïa ki kitei ki mat jingdawa khamtam na ka bynta ki samla pule kumjuh u ba bun balang” ong u D.Sun President jong ka seng.
U la ong ruh, “Ka West Khasi Hills ka la don 78.83 percent ka literacy rate katkum ka cencus ha u 2011. Te kan eh aiu ïa ka West Khasi Hills ban nang kham kiew shuh shuh ha ka jingdon kiba nang ban pule bad ban thoh ban tar, lada ka sorkar kan nang theh shuh shuh ki jingnoh jingïarap kiba long kat kum kitei ki mat jingdawa na ka bynta u paidbah”.