Nongstoiñ, K’lyngkot 16: Ka jingtrei shitom jong ki ar ngut ki nongïalam jong ka Bharatya Janata Party Rambrai Jyrngam Mandal, na ka bynta ka election ka ban sa long ha u bnai ban wan, ki la ïaid shait shait ha man la ki shnong ban pan jingkyrshan na ki paitbah ba kin pynjop ïa ki ha kaba ki paitbah ruh ki la sdang ban phai khmat bad pynïasoh kum ki nongkit kam bad ki dkhot ha man la ki shnong.
Kine ki rangbah ki long u babu Spastarlin Nongrem bad u Francis Pondit R.Sangma u ba dei ruh u MLA barim ka Mawshynrut ki la ïaid shait shait ha man la ki shnong ban pan jingkyrshan na ki paitbah ba kin pynjop ïa ki ha kaba ki paitbah ruh ki la sdang ban phaikhmat, namar kitei ki nongïalam ka party ki leit ban pynlong jingïalang jan man ki shnong.
Kum ban pynkynmaw ba u Francis Pondit R Sangma u la don ka jingthmu ban pan tiket na ka All India Trinamool Congress ba la ïalam da u Dr.Mukul Sangma. Hynrei, ym tip na kaei ka daw um shym la aplai tiket shuh na katei ka party. Hadien kata u la pyrshang ban ïakynduh sa ïa ki nongïalam jong ka West Khasi Hills District Block Congress Committee, ban ïa sngewthuh jingmut na ka bynta ba un aplai tiket. Hynrei na ka liang jong ki Nongïalam ka District Congress Committee kim pdiang ïa ka jingtyrwa jong u.
Kumta utei u MLA barim ka Mawshynrut hadien ba u la shah kyntait na kitei ki party, ha u bnai Jylliew jong u snem ba la lah, u la sdang shait shait ban leit sha ki paitbah ban ïaphylliew jingmut kumno un leh ha kaba ki paitbah ki la ai jingmut ïa u ba un pynrung kyrteng noh sha ka Bharatya Janata Party lada u don jingmut ban ïaleh election.
U bah Sangma u la ong ba kum u rangbah u ba la long teng u nongmihkhmat, u lap ba kane ka sorkar NPP kaba la ïalam da u Conrad Kongal Sangma, ka dei ka sorkar kaba bam duh ïa ka ïoh ka kot jong ki paitbah bad ka dei ruh ka sorkar kaba sarong kyreit da kaba kam trai lut ïa ki skhim bad ki kam pynroi kiba la dep leh da ka sorkar barim.
U la ong ruh ba kum u nongmihkhmat barim u isynei haduh katta katta ïa ki paitbah namar ki shah shet shukor ha kiba bun ki liang, kum ka jingpynsangeh ban pynmih ïa ka resol thungkam pulit, ka jinglehbeiñ ïa ki nonghikai, ka jingthok jong u Conrad Sangma ïa ki paitbah ha Shallang ha shuwa ka elekshon 2018, ba un pyllait noh ïa ka jingtih bad shalan dewïong hapoh hynriew bnai, hynrei haduh mynta ym pat lah ban pyllait luid kumba ju long.
Dei halor kitei ki nongrim ba kum u rangbah u ba la shah jied teng kum u nongmikhmat u hap ban rung sha ka BJP na ka bynta ban ïasaid na ka bynta ki jingeh jong u paitbah hapoh ka constituency.U babu Spastarlin Nongrem u ba dei ruh u Organiser jong ka party u ba la ïaid shaid shaid haman la ki shnong ban leit ïakynduh ïa ki paitbah ban pan jingkyrshan na ka bynta ka election ban wan, u la ong ba wat la um pat tip la ka party kan ai tiket ne em ïa u ba un ïaleh na katei ka constituency ha u snem ban wan hynrei haba u ïohi ba ki paitbah ki mad shibun ki jingeh ha baroh ki liang um banse ban wad ki lad ki lynti kumno ban ïarap ïa ki.
U la ong ruh ba u la ïohlad ruh ban leit sha Delhi bad u la ïakynduh markhmat ban u Narendra Modi Myntri Rangbah duh ka ri ha kaba u la pynsgew ha u ïa ki jingdon kam kiba bun na ka bynta ban kyntiew ïa ka ïoh ka kot, ka kamai kajih, ka rep ka riang, ka jingpynïoh kam ïoh jam ïa ki samla bad kiwei kiwei ha kaba u Myntri Rangbah duh u la pdiang da kaba sngewbha. Kumta u kyrmen ba ki nongïalam ba ha khlieh duh jong ka party hapoh ka jylla kin bynshet ha u kum u kyrtong u ban ïakhun ïa ka elekshon ha u snem ban wan.
