Ka jingdon jong ki skul pule ha ki shnong ki thaw, ka jingmyntoi ïa kiba bun: Pius Marweiñ

Mawkyrwat, K’lyngkot 16: U Nongmihkhmat jong ka Ranikor Constituency, u bah Pius Marweiñ hadien ka jingïoh ïa ka mang pisa na ka sorkar lyngba ka tnad pule puthi kaba long shibynta ban pynbha ïa ki ïing skul jong ka sorkar jaka sngi saitjaiñ jong ka taïew ka 14 tarik u Kyllalyngkot, 2023 u la ïoh ban plie paidbah ïa ki ar tylli ki ïing skul kiba la dep ban shna pynbha.
Ïa ki ar tylli ki skul sorkar ba la dep ba shna pynbha ha ka jingmang kaba mar 37 lak tyngka kawei ka dei ka Largoa Government Lower Primary School bad kawei pat ka dei ka Lower Koltapara Government Lower Primary School ha kaba ïa kine la plie ha ka jingsakhi lang da u bah D.G. Nongsiej, Sub Division School Education Officer (SDSEO), South West Khasi Hills District bad kumjuh ruh ki paidbah jong kitei ki shnong.
U bah Pius Marweiñ haba kren ha ki ar tylli ki jingïalang, u la pynpaw nyngkong eh ka jingkhublei ïa ka Sorkar lyngba ka tnad pule puthi kaba la ai ka bhah kaba kyrpang na ka bynta ka konstitwensi ha kaba haduh 10 tylli ki ïing skul sorkar la dep ban mang ban pynbha ïa ki bad 7 tylli na ki la dep ban pynbha bad 3 pat ynsa leh nangne shakhmat. “Ka pisa ba la mang ka long baroh 1 klur 80 lak tyngka”, ïathuh u bah Pius.
Ha kajuh kapor u la ong ba lada ka skul ka don hynre khlem ki nonghikai kam long kaba dei, ka skul bad ki nonghikai khlem ki khynnah skul ruh kam lah ban long, namarkata, ka long kaba donkam ïa ka jingïatreilang na baroh ki liang ban pyntyllun ïa ka jingnang jingstad hapoh ka dong ka thaiñ.
U bah Pius Marweiñ ha ka jingkren jong u u la kyntu ruh ba kum ki kmie ki kpa kim dei ban khuslai shuh ba phah ïa ki khun ha ki jaka pule namar ha ki skul sorkar ym donkam jingsiew ei ei bad ki ïing skul ha kane ka thaiñ ruh ki la biang pura ym tang ki ïing skul hynrei wat ki nonghikai ruh.
Haba kyntu ïa ki paidbah nongshong shnong, ula ong ruh kum ki paidbah jong ki shnong ki thaw ki dei ban sumar ïa kane ka ïing skul kum ka ïing la jong bad wat ïaleh ne ong ba ka dei ka mar sorkar ba kin ïa leh katba mon, hynrei wat leh kumta.