Nongstoiñ, K’lyngkot 16: U Bah Diostarness Jyndiang, u rangbah ba la jop teng ïa ka bye elekshon MLA na ka party HSPDP, u la iehnoh noh ïa kane ka party kaba u la jop bad pynkhreh mynta pat ban rung noh sha ka BJP. Nalor kata, ki khubor ki ïathuh ba u lah ban ïakhun noh na kane ka party ha kane ka elekshon ban wan.
Ïa ka shithi iehnoh kam u dkhot ba pura jong ks HSPDP u la dep ban aiti ha u President rangbah naduh ka 6 tarik mynta u bnai. Hynrei, u dang pyllait khubor pat mynta ka sngi 16 tarik, namar ha ka 18 tarik un rung noh sha ka BJP bad yn pdiang burom ïa u da ki heh ki haiñ ka party BJP na Shillong ha ka jingïalang ka ban long ha Bishop Hall.
Haba pyrshang ban ïakren bad u Bah Dios, u la ong ba ka daw jong ka jingmih noh na ka HSPDP ka dei ka daw shimet jong u. Hynrei, mynta pat u la pynkhreh ïalade ban ïakhun noh na ka BJP bad ha kaba ïa dei bad kane ka rai lehse yn sa ïa kren bha ha katei ka sngi ryngkat ki heh BJP.
U la ong ruh ba u don ka jingkyrmen ba un jop na Nongstoiñ Consituency, da kaba pyndonkam ïa ki buit treikam kiba u don. Nalor nangta u pynpaw ruh ka jingkyrmen ba ka BJP ha kane ka elekshon ban wan, la kumno kumno kan jop beit 12 lane 13 seat.
