La sdang ïa ka Special Campaign ban ai tika ïa ki khyllung Naduh ba dang kha haduh kiba la dap 2 snem ka rta ha Mawten, Mawkyrwat

Mawkyrwat, K’lyngkot 16: Ka ophis jong u District Medical & Health Officer (DM&HO) ka South West Khasi Hills District, Mawkyrwat mynta ka sngi ka la sdang ïa ka Special Campaign ban ai tika ïa ki khyllung naduh ba dang kha haduh kiba la dap 2 snem ka rta ha Aganwadi Centre, Mawten ha kaba u bah T. Lyngwa, Deputy Commissioner ka South West Khasi Hills District u la long u kongsan.
Haba kren ha ka jingïalang u bah T. Lyngwa u la ong ba u ñiangpyrsit u dei u jingpang uba ïa bit bad pur stet ha ki por kiba mynshuwa bad u neh haduh kumba 10 haduh 12 sngi. Une u jaid khñiang ki ju ïoh bha ki khynnah bad u pynshitom bha hynrei ha kine ki sngi kiba mynta une u khñiang u la kham duna namar la lah ban ïada lyngba ka jingai tika. Ula kyntu ruh ïa ki longkmie ba armet ban shimkhia bha ïa ka koit ka khiah ha ka por ba ki armet khnang ba kan ym wanrah jingeh ïa ki hadien habud da kaba leit phah check up tista bad da kaba pynkynmaw ïa kiba ki dei ban leit kha barobor ha ki jaka sumar khnang ban lait na kino kino ki jingma ne jingmynsaw kiba lah ban mih hadien ba la dep kha ïa ki khyllung.
Ha kajuh ka por u la kyntu ïa ki ban ai tika ïa ki khunrit khnang ban ïada na ki jingpang kiba eh bad ban weng ïa ka jingngeit biej kaba lah ban long ka daw bah jong ka jingbymtreh jong ki ban phah aitika ïa la ki jong ki khun. Namarba ka jingkoit jingkhiah ka long kaba donkam, namarkata, u la ban jur halor ka jingdonkam ban sumar ïa la ka jong ka met ban lait na ki jingpang kiba bunjaid kiba wanrah ïa ka jinglutksan bad kiba tuh ïa ka por bad ka bor.
Hadien kane u la ai dawai ïa iwei na ki khyllung da kaba kyrmen ba kane ka campaign kan long kaba jop.
Haba kren ha kane ka sngi u Dr. W.L. Narry, Medical Health Officer, Mawkyrwat u la ong ba kane ka prokram ka dei hapoh ka National Health Mission (NHM) bad kaba ka jingthmu jong ka, ka long ban pynduh jaid ne rat dyngkhong ïa u ñiangpyrsit lyngba ka jingai tika ha ki jaka ai jingsumar khlem donkam ban da siew dor. Shuh shuh u la ong ba kane ka jingai tika ka long naduh kiba dang kha haduh kiba la dap 2 snem karta bad ruh ïa kito kiba khlem pat ïoh ïa kane ka tika.
U la kyntu bad hikai ruh ïa ki kmie ki kpa ban shim ïa ka PCV bad RVV tika ban ïada ïa ki khyllung na ka Pneumonia bad prie pynhiar. Ha kajuh ka por u la pynthikna ruh ba kine ki tika ki dei kiba la dep test bad kim don jingma ynda la dep ai bad lada jia ba i khyllung i khie shit ki dei ban pyntip mar mar sha ki ASHA bad ANM da kaba kyntu ïa ki ban shim ïa kine ki tika khlem kano kano ka jingsheptieng na ka bynta ka koit ka khiah bad ka jingsan jingpura ki khun ki kti.
U bah. E. Tariang, Child Development Project Officer ruh u la kren ha kane ka jingïalang. U Dr. F.R. Lartang, District Medical & Health Officer (DM&HO) u la pynïaid ïa ka jingïalang.
Kham ha shwa u bah L. Lyngdoh, Rangbah Shnong Mawten u la ai ïa ki kyntien pdiang sngewbha katba ka kong A. Lyngkhoi, BPM ka la ai ki kyntien khublei.