Ka jingïakhun ki binong bishon bad ki lymboit lymbiang

0

Ka elekshon ha Meghalaya naduh ki katto katne snem mynshuwa, ka la kylla long ka elekshon kaba ïakhun hapdeng kiba riewspah bad kiba duk lane hapdeng ki Party heh spah bad ki Party baduk ba kyrduh.
Kumba arphew snem eiei mynshuwa ki rynran ïalap elekshon kim da pylleit jingmut than ha ka jingïakren ïa ka theh tyngka ne ka jingai pisa por elekshon. Hynrei dei naduh ka snem 2008 ter ter ba ka pisa la sdang ban kren briew namar ba la mh ki kyrtong heh spah bad ki paidbah ruh ki la sdang ban ïabeh sha kita ki kyrtong ba sam pisa.
Ka Election Commission jong ka ri India ha ka por ba long CEC u TN Seshan, nangta sa u MS Gill bad u Bah JM Lyngdoh, haba ka la iohi ia kane ka jingtheh pisa por elekshon, ka la wanrah ïa ki jingpynkhlaiñ ïa ka Commisison ha kaba la wanrah bun ki jingpynbha ha ki kyndon bad kata ka long da kaba wanrah ïa ka Model Code of Conduct, khnang ban ïaleh pyrshah ïa ki kam buit tuh bad ki kam beaiñ jong ki Political Party bad ki Candidate.
Hynrei ka Model Code of Conduct wat lada ka la lah ban teh lakam ïa kiba bun ki bynta, hynrei ha kaba ïadei bad ka jingmih ki kyrtong heh spah kiba bun na ki, kidei ki Contractor ne ki Businessman, kam shym la lah ban khanglad. Dei namar kane ka daw ba sa sdang mih ka jingsam pisa ha ka por elekshon, namar ba kiba kum kine ki ïoji beit ba da kaba sam pisa khlem pat da shakri ha ka imlang sahlang kin jop beit ia ka elekshon. Shisha ka la jia kumta haba kiba bun kine ki heh spah ki la jop kum ki MLA jong ka Meghalaya, ha kaba bun na ki, ki la bat ruh ruh ïa ka ktrdan kum ki Minister jong ka sorkar.
Hynrei hapdeng kane ka jingmih ki kyrtong heh spah bad ka jingïabeh ki paidbah nongthep vote sha kita kiba don spah. La ïohi ba ki la mih ruh ki kyrtong ne ki Party jong ki briew ki bym dei satia kita ki heh spah bad kiba nud ban leit sha ki paidbah ruh da ka lynti kaba kren pyrshah ïa ka jingpyndonkam daka bor pisa ha ka por elekshon. Kiba kum kine ym dei ba ki la shu mih, hynrei ki paidbah ruh ki da jied ïa ki ban long ki nongmihkhmat jong ki.
Kane ka pyni wat hapdeng ka jingtyllep ka spah jong ki Party heh spah ne ki kyrtong heh spah, ki dang don ki briew kiba peit ïa ka jinglong u briew ne ka briew ne ki jied ïa ka jinglah jong u ban shakri bad ban ïasaid na ka bynta ki jingeh jong ki bad khamtam eh ban iasaid na ka bynta ki jingeh jong ka jylla.
Ha kane ka elekshon 2023 la ïohi ba wat naduh ka rukom pynlong ïa ki jingïalang paidbah haduh ki buit ba ki pyndonkam ban ïalap elekshon ruh ka don ka jingleh kaba pyni ïa kino ki Party kiba don pisa bad kino ki Party ki bym don pisa ne ki kyrtong ruh kumjuh. Kane ka sakhi naduh ka rukom shna ïa ki rynsan ne ki pandal. Ka rukom wai kali, ka rukom aibam bad kumta ter ter.
Hynrei ha kaba khatduh hi, ka rai kadei ka jong u paidbah, la ka long ïa u Kyrtong ne ka Party heh spah ne ka Party duk ne u kyrtong duk. Dei u paidbah nongthep vote u ban ban ai ïa ka rai ïano ne mano kitra ki 60 ngut ki ban long ki nongïasaid ha ïingdorbar Thawaiñ ka jylla..

Leave A Reply

Your email address will not be published.