Mawkyrwat, Risaw, 13: Kawei ka jingjia ha ka thaiñ Mawkyrwat, ha kaba la lap ïa kawei ka met ïap ba la jan kem pyut jong uwei u briew ba la suba ruh ba u dei u bar jylla.
Katkum ka tyllong khubor, la ong ba la lap nyngkong eh ïa ka met jong u da ki khynnah ap masi ha kawei ka pynthor kba ha Disong kaba don khappud jong ka shnong Mawlangwir, Mawmerang bad Photjaud Rangthong, South West Khasi Hills District.
Ki paitbah ki la ïathuh ba ïa kane ka met ïap la lap nyngkong eh da ki khynnah ap masi kiba dei na shnong Mawmerang. La ïathuh ruh ba ha ka jingshisha ki khynnah ap masi ki la lap naduh sngi Ba-ar, hynrei kim poi pyrkhat ba dei u briew namar ba ki don sha jngai na katei ka pynthor, hynrei dei tad haduh hynnin ka janmiet ba ki la lah ban pyntikna ba u dei u briew.
Ha kaba ïadei bad kane na ka liang jong ki pulit ryngkat ki doktor mynta ka sngi ka 13 tarik u Risaw, 2022 ki la hiar ban tohkit bad pyndep ruh ïa ka post mortem halor kane ka met ïap, kaba la suba jur ba u lah ban shah pynïap dusmon hano hano bad bret pat ha kane ka pynthor kba.
Na ka liang ki Pulit ha ka jingtohkit la lap ba katkum ka Covid Vaccination Certificate la suba ba u dei u Bishal Gurung (30 yrs).
Halor kane ka jingjia na liang ki Pulit ruh ki la dep ba register case.
