Mawthadraishan, Risaw, 13: Ka ‘Chimarlok Production Channel’ ka kynhun nongrwai ha kine ki khyndiat sngi kan sa pyllait paidbah ïa kawei ka Music lyngba ka dur im ne video ha ka 14/10/2022 ha ka por 5 baje janmiet bad ïa kane ka Music Video la ai kyrteng ka “Pawkcha’ kaba dei ka Jingrwai Jingieid.
Ha kaba ïadei bad kane ka bynta, ka Federation of Khasi Jaiñtia and Garo people (FKJGP) Mawthadraishan Circle lyngba u Firstbornjohn Marngar, uba dei u President ka ai khublei bad ka jingkitbok kitrwiang ïa ka ‘Chimarlok Production Channel’ kaba la khot sngewbha ïa ka seng ban ai mynsiem lem ïa ka kynhun jong ki bad khamtam ba kin sa pyllait paitbah ïa kawei ka Music Video.
Namarakata, kum ka seng ka ai Mynsiem ïa kane ka kynhun ka ‘Chimarlok Production’ ba kin nang kiew bad ïaid shaphrang bad nang ïai pynpaw ïa kita ki sap ki phong ba ki ki don ha ka bynta ban shna, thaw ne pynmih jingrwai jong ki, kaba ki don. Ha kajuh ka por kum ka seng buh ruh ka jingkyrpad ki paidbah jong ka dong ka thiañ ba kin ai jingkyrshan lem ïa katei ka kynhun jong ki samla ka ‘Chimarlok Production Channel’ khnang ba kn lah ban ïai pyrshang ban pynpaw ïa ki sap ki phong kaba ki don bad ymdei ban buhrieh namar lyngba ha ki rynsan ‘social media’ ha kaba mynta ka la dei kawei na ki lad ban ai kam ai jam ïa ki samla ba don sap.
“Bun ki samla ha kine ki sngi ki la sdang ban ngop noh ha ki kam sniew ba bun jait kum ka jingdih drok bad kiwei de ki kam sniew bapher bapher namar ki duh jingkyrmen noh tang na ka daw ba ki khlem kam khlem jam”, ong u Firstbornjohn Marngar hynrei kim dei ban sah kut hangta pynban ki dei ban thaw ki lad ki lynti da kaba kin pyrshang ban ïeng ha la ki jong ki kjat da kaba kin wan ki lad kamai ba bun jait.
