Durut dukhi khait ki nongïalam ka HSPDP Mawthadraishan ban pynkhlaiñ ïa ka Party

0

Nongstoiñ, Risaw, 13: Ka Mawthadraishan ka dei ka constituency kaba don mynta ïa u bah H.Brolding Nongsiej u MLA na ka United Democratic Party u ba bat ruh kum u Myntri ha ka sorkar jylla uba peit ïa ka tnad Home Guard bad Water Resources u ban ïaleh biang ïa ka election ha u snem ban wan na katei ka juh ka party.
Kumba ka long mynta ha katei ka Constituency ki dang don tang lai ngut ki kyrtong kata u bah H Broldiong Nongsiej na ka UDP u bah Shakliar Warjri na ka Hill State People Democratic Party uba dei ruh uba dang samla bad ka Kong Biolinda Lyngdoh Nonglait na ka National People Party katba na kiwei pat ki party ym shym pat la don kyrtong satia.
Ha kaba ïadei bad ka election ka ban long ha u snem ban wan u bah W.Sohlang uwei na ki nongïalam ka HSPDP haba ïakren bad u nongthohkhubor u la ong ba ka election ha Mawthadraishan Constituency ha une u snem ban wan kan long kaba itynnad bha namar ba ki nongïalam jong baroh lai tylli ki party ki la trei shitom bad dukhi khait miet la bad sngi ban leit ha manla ki shnong bad ki Polling Station ban ïakynduh ïa ki paitbah bad ban pan ïa ka jingïatreilang bad ai jingkyrshan ban pynjop ïa ki.
Nalorkata, u la ong pat ba kat haduh kine ki sngi u kyrtong ka HSPDP bad ka UDP ki dei hi kiba la kham ha khmat hynrei haduh bakut te ym pat lah ban ong namar ban ïaleh pyrshah ïa u Myntri sorkar kam dei kaba suk tangba ka shong pat ha ki paitbah.
Haba pyrshang ban twad jingmut na kiwei pat ki riew rangbah bad ki paitbah don kiba ong ba ïa mynta kim pat kwah ban ong ei ei namar ba ka por ka dang sah sa saw bnai bad ki dang don bun ki lad jingïarap jong ka Sorkar na ka bynta ki kam pynroi ha ki shnong ki thaw ba ki paitbah ki dang dei ban ïoh hynrei ynda la kut ka por ban pyntreikam ïa ki kam pynroi dei hangta ba lah ban sngewthuh uno u kyrtong uba don ha ka thong ban jop.
Don pat napdeng ki riew paitbah kiba ong ba ha Mawthadraishan Constituency lada jop ka UDP ruh ki paitbah ki kmen lada jop ka HSPDP ruh ki kmen namar baroh artylli ki dei ki party riewlum hynrei ban shu pynjop tang ïa uwei u kyrtong ki paitbah ka Mawthadraishan kim kwah satia bad ïa u Bah H.Brolding Nongsiej ki la pynjop arsien arwat bad ki ngeit ba lada kim kyrshan shuh ruh un ym sngew eiei.
Haba kylli pat la ka Congress kan pynïeng kyrtong neem na katei ka Constituency, ki la ong ba haduh mynta kim pat tip satia namar wat tang kiba kwah ban pan tiket na katei ka party ruh imat ym don shuh bad wat lada ka Congress kan pynïeng kyrtong ruh kan ym poi shuh shaei shaei namarba hapoh ka jylla baroh kawei ruh ym don shuh wat uwei u MLA.

Leave A Reply

Your email address will not be published.