Suba ba ki 4 ngut kiba shah pyniap ha Umpleng ki dei kiba dih bad khaïi drok ong u DIG

Shillong, Naitung 9 : U DIG ba dei peit ïa ka Eastern Range u Davis N R Marak mynta ka Sngi Ba Ar u la ïathuh ba kat kum ka jingtohkit la suba ba ki saw ngut ki briew kba shah pyniap ha ka shnong Umpleng, East Jaintia Hills District ki dei kiba dih bad khaïi drok ha katei ka thaiñ.
“ Kine ki briew ki dei kiba dih drok bad ki dei ruh kiba khaïi ha kajuh ka por. Kane ka long ka jinglap jongka jingtohkit” ïathuh u DIG.
U la ïathuh ba ki pulit ki la sdang lap ksai ruh ïa ki briew kiba donkti ha kane ka jingpyniap ïa kitei ki saw ngut. “ Ngi la sdang ban lap ksai bad ngi kyrmen ruh shen ngin sa ïoh ban kem ïa kiba donkti” ong biang u Marak.
U DIG u la ïathuh ba ka jingjyllei u drok ka shyrkhei bha ha East Jaintia Hills namar ym dei ba ka dei tang ka jaka ïaid lynti u drok hynrei mynta la jyllei palat kiba dih drok ruh.
U la ïathuh ba ym tang ba la thung ïa ka jingtohkit SIT hynrei wat ki pulit na Police Head Quarter ruh ki bud dien ïa kane ka jingjia kata ruh ym dei tang ki ophisar hynrei wat ka DGP da lade hi ruh ka ïai bud dien ïa kane ka jingjia.
Lah ban pynkynmaw ba ha ka 6 tarik Naitung saw ngut ki briew kil a shah pyniap ha ka shnong Umpleng. Ki pulit ki ïathuh ba kitei baroh sawngut ki la shah teh na ki kti bad kjat jongki bad bret ïa ki ha kajuh ka jaka ba kham long khlaw hajan ka shnong.
Napdeng ki saw ngut, lai ngut kiba la shah pyniap ki dei kiba la ithuh kyrteng kum u Ravi Rai, 23 snem ka rta na ka shnong Elam, Mechipradesh, Nepal, u Rajesh Rai, 26 snem na ka shnong Dharan Sunsari, Koshi Anchal, Nepal bad u Nasar Kyndait, 33 snem na ka shnong Dkhiah East Pohshnong, East Jaiñtia Hills District. Katba ia uwei pat uba dang don haduh mynta ha ka jaka buh metiap ha Khliehriat Civil Hospital, ym pat don satia ban kam trai mano kano ruh.
Halor kaneka jingjia ki pulit ki la rejister case ha Khliehriat Police Station.