Shillong, Naitung 02: Ka Golflink SC ka la hap ban wanphai nadien ban pynliem ïa ka Risa Colony SC da 2-1 kol ha ka jingïalehkai na ka Group A jong ka lympung U-20 Fourth Division 2025 ba la pynïaid da ka Shillong Sports Association, hynne ka sngi Balang ha madan First Ground-SSA Stadium, Polo.
Ka Risa Colony ka la ïoh ban lamkhmat nyngkong ïa ka jingïalehkai ha ka kylla step lyngba ka kol na u Teilas Marwein (34’minit), hynrei kane kam shym la neh haduh kaba kut naba ka Golflink ka la ïakhun dohïap ha ka kylla miet ban thep ïa ar tylli ki kol na u Debian Suting (59’min) bad kaba ar na u Andoni Suting (80’min) ban khur pura ïa ki lai point.
Da kane ka Golflink ka la pyndep da kaba jop baroh saw sien lynter ki jingïalehkai bad ban bat ïa ka kyrdan ba nyngkong ha ka Group A da kaba khur 12 poiñ.
Ha kane ka sngi Palei, ka jingïalehkai kan long hapdeng ka Nongthymmai Nongkynrih pyrshah ïa ka Dilingiem, na ka Group C, ha ka por 4 baje janmiet.
