SHILLONG, Naitung 02: Ka All Meghalaya Karate-Do Association [AMKA] ka dap da ka jingsngew sarong ban pynbna ba kawei na ki khynnah ïalehkai Karate jong ka synjuk, kaba la tip kyrteng da ka Kynjailin Lyngdoh Mawnai ka la shah jied ban mihkhmat ïa ka ri India ha ka lympung ïalehkai karate kaba pawnam, kata ka 9th South Asian Karate Championship 2025.
Kane ka Championship kan long ha Colombo, ha Sri Lanka bad kan sdang naduh ka 04 tarik haduh ka 06 tarik Naitung, 2025, ha kaba ka Kynjailin kan mihkhmat ïa ka ri da ka jingsngew sarong ban shimbynta ha ka kyrdan ïakhun U-21 Individual Kumite – 50kg jong ki kynthei.
Ka jingshah jied jong ka Kynjailin ka dei da kaba pynshong nongrim ïa ka jinglehkai ba seisoh jong ka ban khur takma ha ka Karate India Organisation (KIO) 4th Senior and U-21 National Karate Championship 2025, kaba la pynlong dang shen ha Gachibowli Indoor Stadium, Hyderabad.
Ha ka kyrwoh khubor ka AMKA ka la ong, “Ka Association ka sngewkmen bad sngew sarong haduh katta katta ïa ka jingjop jong ka (Kynjailin), kaba ym tang ba ka pynpaw ïa ka jingaiti bad ka sap hynrei ka wanrah ruh ïa ka burom kaba khraw ïa ka jylla Meghalaya”.
U President, General Secretary, ki coach, bad baroh ki dkhot jong ka All Meghalaya Karate-Do Association ka ai khublei da ka dohnud baroh ïa ka Kynjailin halor kane ka jingjop kaba khraw bad ka kitbok kitrwiang ïa kaba bha tam katba ka dang pynkhreh ban sei madan ïa la ka sap ha ka International level. Ai ba ka jingjop jong ka kan long kum ka jingai mynsiem ïa baroh ki nongïalehkai ba dang samla ha kylleng ka jylla” la bynrap kane ka kyrwoh.
