SSA U-16 FL 2024: Yn ïaknieh namlahduh ka Merinda SC & Shillong Soccer Scout

Shillong, Rymphang 08: Ka jingïaknieh namlahduh ha ka lympung phutbol kaba la tip da ka Under-16 Football League 2023-24 ba la pynïaid da ka Shillong Sports Association kan long hapdeng ka Merinda SC pyrshah ïa ka Shillong Soccer Scout, bad ïa kane la pynthikna hadien ba ka Merinda SC ka la pynliem noh ïa ka Umphyrnai SC ha ka jingïakhun semi final kaba ar hynne ka sngi ha madan SSA Ground, Polo.
Ka jingïakhun semi final hapdeng kine ki ar kynhun hynne ka sngi ka la long kaba itynnat, ha kaba baroh arliang ki la ïakhun dohïap ban ïoh pynkhihjar, hynrei dei ka Merinda SC kaba la lah ban pynurlong ïa ka jingangnud lyngba ka kol kaba la thep da u Mebankitlang Mawlong ha ka 42 minit.
Haduh kaba kut ym shym la don shuh mano mano ba lah pynkhihjar, kaba la biang pura ïam ka Merinda SC ban bteng lynti ïaid sha ka final ha kaba kan sa aireng pyrshah ïa ka Shillong Soccer Scout na bynta ka namlahduh.
Kumban shu pynkynmaw, ka Shillong Soccer Scout ka la lah ban pynliem ïa ka Mawreng SC ha ka semi final kaba nyngkong da shi kol, ba la thep da u Prosperwell Ryntong ban ïohrung sha ka final, hynnin ka Sngi Hat Majai.
Na bynta ka final hapdeng ka Merinda SC pyrshah ïa ka Shillong Soccer Scout la pynkhreh ban pynïakhun ha ka 10 tarik mynta u Rymphang, 2024 (Sngi Saitjaiñ) ha kajuh ka madan, kata ha SSA Stadium. ïa kane ka final hapdeng kine ki arliang yn sdang ha ka por 11 baje mynstep.