Da 5 – 4 kol pynliem ka Sumer Veteran FC ïa ka Evergreen SC Nongjri ha ka 3rd Above 40 FT 2023-24

Mawkyrwat, Rymphang 07: Ka Mawten Sports Club ka la ïoh ban pynkut noh ïa ka lympung ïalehkai kynjatbol phainal kaba la tip kum ka 3rd Above 40 Football Tournament 2023-24 ha kaba ka Sumer Veteran Football Club ka la rah ïa ka nam jop ha ka jingïalehkai ha madan Mawpyllun, Mawten, South West Khasi Hills District.
Ha ka jingïakhun kaba dei ha ka jingïalehkai jong ka kyllastep, ka Sumer Veteran FC pyrshah ïa ka Evergreen SC Nongjri ki la ïa khaid khlem da ïoh ban ïa thep wat kawei ka kol ruh.
Haba wan biang ha ka jingïalehkai jong ka kyllamiet, ka Evergreen SC, Nongjri ka la ïoh ban thep ïa ka kol ba nyngkong ha ka minit kaba 44 na u bah Madanlar Hahshah, bad kumjuh ruh ka Sumer Veteran FC da ka jingïakynhun ba tyngeh ha kane ka kynti ruh ka la ïoh ban pynphai ïa kol na u Kit Kharkongngor ha ka minit kaba 62.
Kumta ka jingïalehkai hapdeng ka Sumer Veteran FC bad ka Evergreen SC Nongjri ka la kut noh da ka Tie Breaker ha kaba ka ka Sumer Veteran FC ka la jop noh da 5 – 4 kol pyrshah ïa ka Evergreen SC Nongjri.
Ha kaba kut jong ka jingïalehkai, la sam ïa ki khusnam ryngkat ka song pisa sha baroh ar tylli ki kynhun kata sha kaba jop ka long 65 hajar bad kaba shah rem noh ka long 25 hajar.
U kongsan uba la wan ban pynhap pyrda ïa kane ka lympung ïalehkai jong ka 3rd Above 40 Football Tournament 2023-24 u dei u bah Robertjune Kharjahrin uwei na ki kyrtong sha ka MP Election ryngkat ka jingïadonlang jong ki nongkitkam ka Mawten Sports Club, ki riew rangbah jong ka shnong bad kumjuh ki nongkyrshan jong baroh ar tylli ki kynhun.