Shillong, Rymphang 08: Ka kynhun ïalehkai kriket jong ka Meghalaya kan sa hap ban aireng pyrshah ïa ka Mizoram ha ka semifinal jong ka Ranji Trophy na ka thup ïakhun plate group ka ban sdang naduh mynta ka sngi, ha kaba ïa ka jingïakhun la khreh ha Mangaldai, Assam.
Ka Meghalaya ka la pyndep ïa ka round robin stage ha ka kyrdan ba ar – hadien ka Hyderabad – katba ka Mizoram ka la pyndep ha ka kyrdan ba lai.
Haba kyllumlang baroh, ka Meghalaya ka la jop lai sien bad shah rem ha ki ar tylli ki jingïakhun – kiba ka la mad ha ka jingïakhun pyrshah ïa ka Hyderabad bad ka Mizoram.
Lah ban kdew ba ka Mizoram ka dei ka kynhun kaba khlaiñbor, ka la jop da 191 ron ha ka jingïakhun ba ladep pyrshah ïa ka Meghalaya kaba la long ha Anand, Gujarat. Hynrei, baroh arliang ki sngewthuh shai ba yn nym shim lane bishar na katei ka jingïakhun ba ladep, ha kaba kine ki ar kynhun kin sa ïakynduh pat sa shi sien ha ka playoff ïa kaba ka Meghalaya ka la khreh ban pdiang pynlong shabar; namar ha Shillong kan don ka jingïalehkai ka lympung U-23 men’s Col CK Nayudu Trophy semifinal, ka ban sdang naduh ka Sngi U Blei.
Na ka liang jong ka Senior Men’s Selection Committee jong ka Meghalaya Cricket Association (MCA) ka la dep ban jied ïa ki 15 ngut ki player bad ki standby ban mihkhmat ïa ka jylla ha ka knockout stage jong ka Ranji Trophy.
U Kishan Lyngdoh un dang bteng ban ïalam ïa ka kynhun kum u kapten, u ba la lah ban tyngshaiñ bha ïalade da kaba tied 572 ron na ki phra inning, kiba kynthup ïa kawei ka spah ron bad lai sien ba kamai sanphew ron. U Akash Kumar Choudhury, u ba la duh ban mih madan ha ki ar tylli ki jingïakhun ba sdang jong ka samoi un sa wanphai pat na ka jingmynsaw, u la khur 23 wicket na ki lai sien ïakhun, kaba la kyntiew ïa u ha ka thup ba 13 napdeng ki rangïalehkai hapoh ka ri.
U ruh u la shah kynthuplang na bynta ka semifinal bad ka don ruh ka jaka na bynta u Aryan Borah, u ba la seisoh bha ha ka jingïalehkai pyrshah ïa ka Sikkim ban khur haduh 12 wicket ha ka sien mih madan ba nyngkong ka lympung Ranji mynta ka samoi.
Kumban shu pynkynmaw, kane ka samoi ka long kaei kaei ka ban sah jingkynmaw ïa ka jylla, ha kaba ka MCA ka la shim ïa ka rai ban pynïalehkai da tang ki rangïalehkai napoh ka jylla ha kane ka lympung. ïa kane ka rai la nang pynsngewsarong hadien ba ka kynhun ka la lah ban wan kyrdan ba ar na lka thup, bad na ka liang jong ka Meghalaya ka kyrmen skhem ba ki rang ka kynhun kin ïakhun tyngeh ban jam shaduh ka final.
Ki kyrteng jong ki rangïalehkai ban mihkhmat ïa ka Meghalaya ha ka Ranji Trophy semifinal pyrshah ïa ka Mizoram ki long: Akash Kumar Choudhury, Anish Charak, Arien B Sangma, Aryan Borah, Chengkam Sangma, Dippu Sangma, Jaskirat Singh Sachdeva, Kishan Lyngdoh (Captain), Pringsang Sangma, Ram Gurung, Riboklang Hynniewta, Raj Biswa, Sanvert Kurkalang, Swarajeet Das, Yogesh Tiwari.
Player Standby: Rounak Nongrum, Adarsh Joshi, Bijon Dey, Himan C Phukan, Manish K Rai, Lerry G Sangma. Support staff: Goutam Shome (head coach), Moisten Ch Marak (assistant coach), Vikash S Chauhan (trainer), Surojit Biswas (physio), Dister Marbaniang (manager)
