Shillong, Risaw 12: Ka resol jong ki lai tylli ki jingïakhun ka lympung SSA SRGT 3rd DIVISION Football League 2023 kaba la long ha madan 1st Ground SSA Stadium bad 3rd Ground, Polo hynne ka Sngi Palei.
Ka jingïalehkai kaba nyngkong ha ka por 1:10 baje mynsngi ha madan 1st Ground SSA Stadium, ka Tynring SC ka la jop suk da 5 – 2 kol ïa ka Nongumlong SC.
Ki san kol na bynta ka Tynring SC la thep da u Mariabiang Kharmalki (2 min), u Korbar Nongspung (39 min), u Arborlang Nongpluh (48 min), u Bankitlang Kharkongor (57 min) bad khadduh na u Rahbor synnah (83min).
Katba ïa ki ar kol na bynta ka Nongumlong SC la thep hi da u Nehlang Kharsohnoh ha ka minit kaba 27 bad 54.
Haba phai sha ka jingïakhun kaba la sdang ha ka por 3 baje nohphaisngi kaba la pynïakhun ha madan1st Ground SSA Stadium, hapdeng ka Umlyngka SC pyrshah ïa ka Gorkha Association, ka jingïakhun ka la jam sha kaba kut ha kaba ka Umlyngka SC ka la khur namjop salit da shi kol, bad ïa kane la thep da u Chesterfield Makroh ha ka minit kaba 75.
Katba ka jingïalhekai kaba la sdang ha kajuh ka por (3 baje) ha madan 3rd Ground MFA Turf, ka Lumdiengjri SC ka la pynliem ïa ka Lawmali Pyllun SC da 2-1 kol.
Ha kane ka jingïalehkai, dei ka Lawmali Pyllun SC kaba la ïoh ban plie pyrda ban pynkhihjar lyngba u Banganson Nongphlang ha ka 7 minit. Hynrei ka Lumdiengjri SC ka la jubab ban pynïakhaid lyngba u Robin Pnar ha ka 32 minit shuwa ba u Nick Roy Syiem un thep ïa ka kol ban pynjop ha ka 39 minit.
Mynta ka sngi kin don haduh saw tylli ki jingïakhun kiba yn pynlehkai ha ar tylli ki madan, ki ar tylli ki jingïakhun ki ban long ha madan 1st Ground SSA Stadium, kaba nyngkong kan sdang ha ka por 1:10 baje mynsngi hapdeng ka Nongmynsong SC pyrshah ïa ka MLP FT. Nangta bud sa ka jingïakhun kaba ar ha ka por 3 baje hapdeng ka Pomlakrai SC pyrshah ïa ka Mawryngkneng SC.
Katba ki ar tylli ki jingïalehkai ki ban ïakhun ha madan 3rd Ground MFA Turf, Polo, kaba nyngkong ka long hapdeng ka PFR FA pyrshah ïa ka Nongkseh SC por 1:10 baje mynsngi bud sa ka jingïakhun ha ka por 3 baje nohphaisngi hapdeng ka Umpling SC pyrshah ïa ka Mylliem Lum SC.
