Sdang ka Megha Kayak Fest ba 3 sngi ha Wah Umtrew jong ka shnong Umtham
Shimbynta shitrhem ki heprit ka jylla haka sngi sdang.
Nongpoh, Risaw 12: Ka jylla Meghalaya mynta ka sngi ka la ïoh biang ban sakhi sa shisien, ïaka tamasa kieng lieng ka bala tip kum ka Megha Kayak Festival ba la pynlong ha ka Wah Umtrew, Shillong White Water Village kaba hap hapoh ka shnong Umtham, Ri-Bhoi District bad ïa kane ka tamasa kieng lieng la pynlong da ka Ri-Bhoi Water Sports & Tourism Cooperative Society Ltd ha ryngkat ka jingïatreilang bad ka tnad Sports & Youth Affairs ka jylla.
Kane ka tamasa ka dei kaba hynriew bala pynlong ha ka Wah Umtrew bad kaba la ïoh ban sdang noh mynta ka sngi ka 12 tarik bad yn pynkut pat haka 14 tarik Risaw bala sakhi ruh da ka jingwan shim bynta shitrhem daki nongkieng lieng bna nam na kylleng ki ri ka pyrthei, bad kumjuh ruh naka jylla kiba la dep pyntbit bha ïalade.
Naka liang ka kong Lary kordor Kharkhrang dkhot jong ka Ri-Bhoi Water Sports & Tourism Cooperative Society Ltd ka la ïathuh ba ha kane ka tamasa ïakop kieng lieng ki don haduh 25 ngut ki nongkieng lieng kiba nabar ka ri kiba la ïawan ban ïashim bynta bad naka jylla Meghalaya ki don 3 ngut ki ban ïakhun haka professional category bad 8 ngut ki ban ïakhun haka intermediate category.
Ha kane ka sngi la ïoh ban pynïalehkai shwa ïaki khynnah rit haka intermediate category bad ïaki ba sah yn sa bteng pat lashai bad lashisngi.