Shillong, Risaw 12: U Myntri Rangbah jong ka jylla Meghalaya, u Conrad K Sangma hynnin ka Sngi Palei jong ka taïew ba ladep u la plie ïa u mawnongrim na bynta ka Rongjeng Stadium ha East Garo Hills ha ka jingïadon ryngkatlang u Myntri ka tnat Sports , u Bah Shakliar Warjri bad u MLA katei ka thaiñ, u Jim Sangma bad u Rupert Momin.
Kane ka Stadium la shna ha ka jinglut kaba haduh 9.25 cr, kaba kynthup ïa ka jingpynbha ïa ka madan-lehkai bad ïa ka jaka shong jong ki nongpeitkai (Galery).
Haba ai jingkren ha katei ka jingïalang, na ka liang jong u Conrad K Sangma u la pynkynmaw ïa ka jingthmu jong u PA Sangma (bam kwai ha dwar u Blei), u ba don ka jingïadei kaba jan bad ki nongshong shnong ka Rongjeng.
U Myntri Rangbah u la ong ruh ba ka jingwanrah ïa ka Rongjeng Sub Division bad kiwei ki jingtei ki ban sa poi sha kane ka thaiñ, ka dei kaba la angnud da u PA Sangma (bam kwai ha dwar u Blei) na bynta ka Rongjeng.
Haba kren halor ki jingtei kiba biang na bynta ka Sports, u la ong ba ha kine ki san ba ladep naduh 2018, ka sorkar ka la pynlut haduh 400 cr tam, haba nujor bad ki 45 snem mynshwa.
U la pynbna ruh ba ha kine ki san snem ban wan, ka jinglut jingsep kaba duna ïa ka 1000 cr kaba la bynta ha ka bailut ban tei ïa ki jingtei ban kyntiew ïa ka Sports ha kylleng ka jylla.
“Naduh ba ngi la ïoh ïa ka jylla kaba pura lait noh naduh u snem 2018, ka sorkar kam pat da pynleit jingmut ban pynlut ban kyntiew ïa ka sports, hynrei mynta ka sorkar ha ka jingïalam jong ka MDA ka la ïohi jngai ïa ka jingdonkam ban kyntiew ïa ka sports bad ngi la lah ban pynlong ïa katto katne ki prokram ban kyntiew ïa ka Sport hapoh ka jylla”, u la ong.
U la pynbna ruh ba ka sorkar ka la buh thong ruh ban pynthymmai bad pynïoh siang phlang plastik (artificial turf) ha ki 25 tylli ki madan phutbol jong ka jylla. U la ong ruh ba bun jait ki jingïalehkai sports ki la ïoh jingrap ban kyntiew bad pynjanai shuh shuh, khnang ba ki khynnah ba dang khie-san kin ïoh jingmyntoi da kaba shimbynta ha ki sports program bapher bapher.
Shuh shuh, u la pynbna ruh ba ïa ka Meghalaya Games 2023 yn sa long ha Tura mynta u snem, kaba kin don haduh 3000 ngut ki nongïalehkai (athlete) jong ka jylla ki ban shimbynta.
“Ka thong kaba hakhmat jong ngi ka long ban pynbit pynbiang ïa ki jingtei bad ki jingdonkam haba ïadei bad ka Sports khnang ba ki samla kin ïoh ïa ka kabu kaba biang ban sei madan ïala ka jong ka sap”, u la ban biang.
Katba na ka liang jong u Myntri ka tnat Sports , u Bah Shakliar Warjri u la ong ba ka sorkar ka la kut jingmut ban kyntiew ïa ka Sport hapoh ka jylla.
“Hapoh ka jingïalam jong u Myntri Rangbah, u Conrad K Sangma, ngi la kular ban treishitom ban kyntiew bad ban pynbiang ïa ki jingtei kiba bit na bynta ka sport hapoh ka jylla. Ngi kwah ban pynlong ïa ka Meghalaya kum ka jylla kaba tbit bad ka pdeng jong ka Sport”.
Ha kane ka sngi la ïoh ruh ban pyndep ïa ka jingïakhun final jong ka MLA Cup hapdeng ka United Shallang FC bad ka Balbarian Sports Club Rongjeng.
