SHILLONG, Nailur 09: Ka Mylliem Lum SC ka la ïoh ban khur pura ïa ki lai point hadien ba khur jingjop ha ka jingïalehkai ba la long ha ka Lah Sngi U Blei jong ka lympung Shillong Sports Association Second Division 2024 ha SSA Ground, Polo. Katba ha kawei pat ka jingïakhun ka Lumshyiap SC ryngkat bad ka PFR FA ki la ïasam mar shi point naba ïakhaid.
Haba phai sha ka jingïakhun hapdeng ka Mylliem Lum SC pyrshah ïa ka Marbisu SC, ka shi kol na u Mecheal Roy Kurbah (73 minit) ka la biang pura ïa ka Mylliem Lum SC ban khur shalade ïa ki lai point. Kane ka dei ruh ka namjop kaba ar sien ïa ka Mylliem Lum SC ha ka Group B, bad mynta ka la kynjoh 6 point.
Haba phai pat sha ka jingïakhun hapdeng ka Lumshyiap SC bad ka PFR FA, ka la jam sha kaba kut ha kaba baroh arliang ki la ïoh ban thep mar 2 kol.
Ka jingïalehkai ka la long kaba itynnat, ha kaba ka Lumshyiap SC ka la sdang pynkhihjar tang hadien 19 minit ba la ïaid ka por lyngba u Dawanmardor Suram, hynrei ka PFR FA ka la pynïakhaid lyngba u Nickhel Lyngkhoi ha ka minit ba 21shuwa ba u Robi Maring un thep ïa ka kol kaba ar ha ka 37 minit.
Na ka liang jong ka Lumshyiap kam shym la kynrandien na kane ka jingïakhun bad dei ha ka khyllipmat shuwa ban kut ka por ba u Dawanmardor Suram u la pynkhih ïa ka kol kaba ar (90+1 minit) ban pynïakhaid.
Katkum ka prokram ba la pynbeit, ki jingïakhun na bynta ka Second Division kan bteng biang la Sngi Thohdieng.
Mynta ka Sngi Hat Majai (10 tarik Nailur, 2024) yn bteng biang ïa ki jingïakhun ha ka kyrdan SSA Third Division 2024, ka jingïakhun ha ka por 12:30 baje mynsngi kan long hapdeng ka Lamlynti FC pyrshah ïa ka Rynjah SC, nangta kaba ar ha ka por 3:30 baje nohphaisngi hapdeng ka Mawshbuit SC pyrshah ïa ka Sanmer SC. Baroh ar tylli ki jingïakhun kin long ha madan SSA Ground, Polo.
