Kitbok u MLA Mawkynrew ïa ki 6 ngut ki nongïalehkai Muaythai ki ban ïashimbynta ha ka C’ship ha Bangkok

Shillong Nailur, 09: Hynriew ngut ki khynnah kynthei bad shynrang hapoh ka lama jong ka Muaythai Association of Meghalaya kin sa mih na Jylla ban leit ïashimbynta sha ka lympung ïakhun Muaythai kaba la tip da ka ‘IFMA Youth World Championship Muaythai’ ka ban sdang naduh ka 11 tarik haduh ka 20 tarik u Nailur, 2024 ha Bangkok, Thailand.
Shuwa ba kin leit ïashimbynta sha kane ka Championship, ha ka 6 tarik u Nailur, 2024, ka synjuk ka la leit ban ïakynduh ïa u Bah Banteidor Lyngdoh, MLA ka Mawkynrew Constituency bad Myntri barim ka tnat Sports jong ka Sorkar Jylla kum u Chief Patron, ha kaba na ka liang jong u – u la ai ka jingkitbok kitrwiang ïa kine ki khynnah ba kin lah ban ïalehkai bha bad wanrah burom ïa ka jylla.
Ha ka jingshisha ki don haduh 10 ngut ki khynnah ïalehkai kiba la shah jied sha katei ka lympung ïakhun hynrei namar ka jingeh ba ki ïakynduh khamtam ha ka liang ka pisa, lai ngut na ki hi ki la hap ban iehnoh na kaba leit sha katei ka lympung.
Ia kine ki khynnah ïalehkai la jied hadien ba ki la seisoh bad khur takma na ka National Muaythai Championship ba la pynlong ha Laxmi Bai Physical Education Tapesia, Sonapur ha Assam ha u bnai Jymmang mynta u snem.
Ka kynhun ki khynnah ki ban iashim bynta ki long ka Dasngewtngen E Nongrum, ka Alphonsa Ziania Wriang, ka Mary Christine Wriang, ka Madona Taro, u Bansahnamkyrpang Warkhyllew bad u Andy Taro.
Ia kane ka kynhun yn ialam da u Bah Angelus Sun, Secretary ha ryngkat u Bah Pynsuklang Sumer uba dei u Judge bad Refree.
Nalor kine, u samla Skhemborlang Marwein, uwei na ki samla ba paw khmat na kum kine ki jingiakop ïakhun Muaythai un leit lang bad kane ka kynhun sha Thailand ban ia aireng pat ha lai tylli ki lympung iakob ha Bangkok.