Shillong, Nailur 09: Ka jingpynkhreh jong ka Meghalaya State Olympic Association (MSOA) na bynta ka 3rd Sohra International Half Marathon ka la ïaid shakhmat bad haduh mynta ki la don haduh 7 hajar tam kiba ladep pynrung kyrteng ïalade na bynta ka jingïakop mareh thong ka ban long ha ka 21 tarik mynta u Nailur.
Kane ka lympung kaba la ithuh da ka Athletics Federation of India (AFI), la pynlong da ka Meghalaya Athletics Association bad ka Meghalaya State Olympic Association ha ka jingïatreilang bad ka tnat Sports jong ka Sorkar jylla.
Mynta u snem ka Sohra International Half Marathon 2024 ka kynthup ïa ki kyrdan bapher bapher ba la bynta katkum ka snem jong ki nongïashimbynta, kine ki kynthup ïa ka : 21K Elite Open (18 snem shajrong Shynrang bad Kynthei), 21 K Open (18 snem shjrong), 10K Open (40 snem haduh 50 snem shapoh), 10K Open (50 snem haduh 60 snem shapoh), 10K Veteran (60 snem shajrong) bad ka 5K Run for Fun (Shynrang bad Kynthei).
Haba ai jingkren sha ki lad pathai khubor, na ka liang jong u Bah Finely L Pariat – General Secretary jong ka MSOA ha ka Lah sngi U Blei u la pyntip ba ka jingpynrung kyrteng na bynta kane ka Marathon kan kut mynta ka Sngi Hat Majai (10 tarik Nailur). Tad haduh mynta ki nongïashimbynta ha ka Run for Fun ki don haduh 5583 ngut, katba ha ka 10k run 21k ki long 2153 ngut bad baroh ki la don haduh 7736 ngut. Nalor kata kin don ruh 7 ngut ki nongïakop mareh nabar ki ban ïashimbynta ha kane ka jingïakop mareh thong ka ban long ha 21 tarik, kine ki kynthup na Bangladesh, Ethopia bad na Kenya.
Mynta u snem ka jingmareh kan sdang naduh Laitsohpliah bad kan kut ha Mawsmai (Nohsngi-thiang), bad ka por kan long naduh 6:30 mynstep, u la bynrap. Ka jingsam ïa ki sopti bad ki Bib Number kan long ha ka 19 bad 20 tarik ha JN Stadium, Polo.
Haba phaidien, ka jingwan ki nongïashimbynta ha ka Sohra Internation Half Marathon ha u snem ba ladep ki don haduh 3400 ngut, hynrei kumba ka paw mynta ka jingpynrung kyrteng ka la tam ar shah, ha kaba ki la don palat 7 hajar kiba ladep ban pynrung kyrteng.
Ka song tyngka ïa ki nongjop ha ka 21k elite open (18 snem shajrong) la ïoh ban kyntiew na ka 1 lak sha ka 1.50 lak, bad ka song tyngka ba la pynkhreh sha ki lahduh ha ki kyrdan bapher bapher ka long kumba 40.60 lak. Nalor kane yn sam khusnam kyrpang ruh ïa ki nongïashimbynta kiba la 50 snem shalor kiba lah ban pyndep haduh kaba kut ïa ka 21K.
Na ka liang jong ka synjuk ka la kyrpad ïa ki nongïashimbynta ba kin poi ha ka por ba biang ha ka step jong ka 21 tarik.
