Shillong, Nailur 06: U Bah PT Sawkmie, MLA barim u la pynpaw ïa ka jingsngewkhia ba bun ki Sports Club hapoh Mawlai konstitwensi ki la shah iehnoh beiñ, namar kim ju ïoh shuh kino kino ki jingïarap na ki nongmihkhmat.
U bah Sawkmie u la khlei ïa kine ki kyntien haba kren ha ka jingïakynduh kyrpang jong u ïa ka Umphrew Sports Club, hadien ba na ka liang kane ka Sports Club, ka la pynpaw sha u ban ïarap lem na ka bynta ban pynlong ïa ka football tournament hapoh shnong, kiba la pynpaw ruh ba naduh ba u Bah PT Sawkmie um don shuh ha ka shuki ym ju don shuh ki tournament ha kiba bun ki shnong kiba hap hapoh Mawlai Konstitwensi.
Kumta haba ïadei bad kane na ka liang jong u Bah Sawkmie u la pynpaw ïa ka jingsngewkhia kaba jur namar ka jingshah iehnoh beiñ jong ki sports club, ki seng samla, bad kumjuh ki samla ba donsap, ki ruh kim ïoh shuh kano kano ka jjngïarap pisa na ka liang ki nongmihkhmat.
Na ka liang jong u bah Sawkmie u la kular ba un sa ïarap ïa ka Umphrew SC na ka bynta ban pynlong ïa kane ka tournament bad kumjuh ban ïarap ïa kiwei kiwei de ki club kiba don hapoh mawlai Konstitwensi.
