Shillong, Risaw 16: Ka Rangdajied United ka la thep saw kol tang hapoh saw minit ha kaba sdang jong ka kylla miet ban pynpjah shi syndon ïa ka lyer ïakhun kaba beh jong ka Mylliem ha kawei naki jingïalehkai jong ka ha ka Shillong Premier League 2025, kaba la long ha ka janmiet jong ka sngi Palei ha madan First Ground-SSA Stadium, Polo.
Kane ka jingïalehkai ka la kut noh da 4-1 kol ha kaba kadei ruh ka jingïalehkai kaba khatduh jong ka Mylliem ha ka samoi ba nyngkong jong ka ha ka lympung SPL. Ka RUFC ka la ïoh ban pynkhihjar lyngba u Micky Marwein (48’), u Dibormi Kassar (49’, 50’) bad u RT Hanson Pdang (52’), katba u Alem Khongwir (68’P) u la pynphai shi kol na ka penalty na ka bynta ka Mylliem hadien ba baroh ki jingjulor ki la dep ban jia ïa ka kynhun.
Ka jingjop ka la ïohi ïa ka Rangdajied ban kiew sha ka kyrdan ba san da kaba sah sa kawei ka jingïalehkai ban pyndep – mynta ki la khur 12 poiñ na ki phra tylli ki jingïalehkai. Katba ka Mylliem, da 11 poiñ, ka la hiar shi kyrdan sha ka kyrdan ba hynñiew.
Ki la don bun tylli ki khyllipmat kiba paka ha ka kylla step hynrei ym shym la don ba lah ban pynkhihjar. Ka Mylliem ka la long kaba seisoh ha kaba sdang, hynrei baroh ki jingpyrshang thep kol jong u Kevin Kurkalang, u Remark Kharmalki, Alem, bad u Banraplang Nongsteng ki la la shu long lehnoh ei, kaba la pynlong ïa ka kynhun ban thylli khlem kol.
Nangta ka Rangdajied ka la ïoh ïa kabu kaba bha tam lyngba u Micky hynrei la shah kyntait noh ha u rangap kol ka Mylliem u Rihoklang Khongjoh. Ha ki minit pynjlan shuwa ban shongthait, u Dibormi bad u Hanson ki la pynsyrwa ïa ka kabu ksiar ban buh hakhmat ïa ka kynhun.
Ka jingïalehkai ka la kylla syndet syndet ha ka kylla miet, ha kaba ka Rangdajied ka la pyni shai kdar ïa ka jingthmu ban khur ïa ka jingjop lyngba ki kol kaba la bud kawei hadien kawei pat. Ka jingtuid jong ki kol ka la sdang na u Dibormi, uba la pashat ïa ka bol sha u Micky ban pynkhihjar.
Nangta u Dibormi da lade u la bynrap da kaba thep sa ar tylli ki kol, shuwa ba u Hanson un pynkhih ïa ka kol kaba khatduh ban pynskhem ïa ka jingjop.
Kam shym la don shuh kano kano ka lad ba ka Mylliem kan jubab, watla katta ruh, ki la ïoh ïa ka penalty ha ka minit kaba 68, kaba la thep da u Alem.
Ha kane ka sngi Thohdieng, ka Mawlai kaba wan ha ka kyrdan ba lai kan aireng pyrshah ïa ka kynhun kaba wan sha trai duh jong ka miej ka Nongrim Hills ha ka por 4:30 baje janmiet.
