Ka Meghalaya ka dei shisha ka jylla kaba U Blei U la kyrkhu namar ka jingdon ka mariang kaba pyngngad bad kumjuh ruh ka jingdon ka spah mariang kaba lehse kiwei pat ki jaka ki bynnud ba kim don kumba don ki jaka ha kane ka jylla. Ka jylla ka don ïa ki lum ki wah, ki krem ki kroh, ki kshaid bad kiwei pat ki jingitynnad kiba U Blei u la kyrkhu kyrpang ïa kane ka thain kum kata kaba ki riew tymmen mynshwa ki ju ong ba ka dei ka ri ba ieid ki blei. Dei namar kane ka daw ba ka wat lada ka jylla kam pat don ïa ki ki kad liengsuin kiba heh ne ki surok kiba ong kita ki Express Highway ne ka Lynti rel, pynban ki briew na kylleng ka pyrthei ki angnud ban poi sha kane ka jylla.
Shisha ka kam jngohkai pyrthei ha kine ki khyndiat snem ba ladep, ka la kiew kynsan ha kaba lah ban shakhi na ka jingmih ki Hotel, ki Resort, ki Guest House, ki Home Stay ha kylleng ki jaka jong ka jylla, kiba mynshuwa la ju lap ba ki jaka sah na ka bynta ki nongwan kai ki don beit tang ha Shillong bad katto katne tylli eh ha ki thain Sohra. Hynrei mynta kine ki jaka sah bad ki jaka bam ki la don lut ha man la ki jaka ba don ki jaka jngohkai pyrthei. Ka jingroi sted ka Science bad Technology lyngba ka juk jong ka Digital Information ki briew na kylleng ki ïohi lut ïa ka jingitynnad ka mariang hangne khamtam eh lyngba ka rynsan Social Media. La ju sakhi ba ki nong leh youtube ba ki ju khot ki youtuber kiba pawnam na kylleng ki bynta jong ka ri India bad wat jong ka pyrthei ruh ki tuid sha kane ka jylla ban pynphriang ïa ka khubor jong ka jingitynnad ka mariang.
Kane ka jingkiew ki kam jngohkai pyrthei ha ka jylla shisha ka la long ka jingkyrkhu kaba khraw ïa ki paidbah khamtam kito kiba ïadei kam bad ka jingpynbiang ïa ki jaka sah, ka bam ka dih ne wat kito kiba ju im da kaba ïalam ïa ki nongwan shang pyrthei kata kynthup naduh ki trai Hotel, ki trai Guest House, Home Stay, nangta ki nongpynïaid ïa ki Restaurant, ki dukan, ki trai kali, ki nongñiah kali bad bun kiwei kiwei pat ki bynta kiba la ïoh nong namar kane ka jingkiew ka kam shang pyrthei ha ka jylla. Ka nuksa kaba ha khmat eh kadei ïa ka thain Sohra kaba wat hadien ba ka shah ktah tyngeh na ka jingkhang khyrdep noh ïa ka karkhana shna dewbilat jong ka Mawmluh Cherra Cement Limited (MCCL).
Ka jylla watla ka la kham biang mynta na ka jingdon ki jaka sah, ki jaka bam hynrei ka dang hap pat ban pynbiang shibun kiei kiei na ka bynta ka jingdonkam ki paidbah nongwankai. Na kaei kaba ki nongwan kai ki pynpaw na ka por sha ka por ka long ba ka jylla ka hap ban buh khambun ki jaka leitbar kaban don pahuh ka um. Kane kadei ka bynta kaba hakhmat eh kaba ki nongwan kai ki thnum bha haba ki wan sha kane ka jylla. Ka jingpynpaw jong ki ka long ruh ba ïa kine ki jaka leit bar dei ruh ban buh h aki jaka kiba kham long kylluid bad kham shynna kiba lah ban ïohi ne lada ka dei kham pajih na rud surok dei ban don noh da ki kynja jingkdew.
Kawei pat ka bynta kaba ar ka long ba ki ju don ki nongwan kai kiba wan sah tang kumba shi miet ha kane ka jylla kumta lada ki wan ha ka sngi Nyngkong kaba mut ha ka sngi Ba-ar janmiet ki la leit phai noh. Na ka bynta kiba kum kine ki nongwankai kim pynlut por ban leit shang sha ki iew ki hat ne ban shu shang kai tang ha kito ki jaka ba don ki jaka sah hynrei kin pynlut por beit ha ki jaka jngohkai pyrthei. Na ka bynta jong ki, kaei kaba ki kwah ka long ba kin leit phai da kaba rah ei ei sha la shnong ne kita ki jingrah rneng ïa ki paralok. Ha kum kane ka khep la sngewdei ban kyntu ïa ka sorkar jylla ba ka dei ban wad ki lad ki lynti ban pyrthuh bud ïa kaei kaba kiwei pat ki jylla ne ki ri ki ju shna bad die pat ha ki jaka jngohkai ban pynsah kynmaw ïa ki nongwan kai. Ka Meghalaya ka la pyrshang da kaba buh ïa ki jaka pynriam tynrai ïa ki nongwan kai ba kin ïoh ban shondur bad buh nam ïa ki dur ba ki shon hynrei kam pat lah pat ban don ne shna pat ïa ki kynja tiar pynsah nam kiba lah ban pynkmen ne khring ïa ki paidbah ba kin thied.
Ym lah len ba ka la don ka jingpyrshang ban shna da ki kynja mawbynna, ki kynja jingdeng lane ki tiar tynrai hynrei kiba bun hi kim da phaikhmat than sha kine ki jait tiar namar ki la long kynrei. Kumta kum ka jylla bad khamtam ïa ka tnat Tourism jong ka sorkar donkam ban wad ïa ki lad ki lynti kumno ban don ïa kita ki kynja tiar kiban long kum ka shap ne ka nongmuna kaba ki paidbah kin rah pat sha la ka jong ka jylla ne ka ri ba ki wan ban pyni sarong ba, ‘Kane kadei ka tiar ba nga thied sahnam na Meghalaya.’
