Sa shi poiñ donkam ka India ban ïohrung sha ka AFC U17 Women’s Asian Cup

BISHKEK, Risaw 16: Ka kynhun ki thei ïalehkai phutbol U17 jong ka India ka sah satang shi poiñ, ban thaw ïa ka histori da kaba long ka kynhun kaba nyngkong eh ban ïoh ïa ka jaka ha ka AFC U17 Women’s Asian Cup katkum ka jingïoh kamai point ha ka jingïalehkai Group.
Ka India kan ïakhun pyrshah ïa ka Uzbekistan ha ka jingïalehkai ba khatduh jong ka Qualifier ha ka Group G ha Dolen Omurzakov Stadium ha Bishkek ha kane ka sngi Thohdieng, 17 tarik u Risaw, 2025, ha ka por 6:30 janmiet, da kaba tip ba lada ki lah ban kiar na ka jingshah rem kan pynthikna ïa ka jaka jong ki ha ka AFC U17 Women’s Asian Cup 2026 ban sa long ha China. ïa kane ka jingïalehkai yn pyni live ha ka Kygyrz Sport TV YouTube Channel.
“Kane ka jingïalehkai ka dei kaba ngi la pynkhreh bha baroh kine ki bnai,” la ong ka kapten ka Julan Nongmaithem, kaba la thep ïa ka kol ha ki minit ba khatduh (90’) ha ka jingjop da 2-1 kol jong ka India pyrshah ïa ka Kyrgyz Republic ha ka jingïalehkai kaba nyngkong ha ka Lah sngi U Blei.
“Ka la long ka jingsdang kaba eh bha ha ka jingïalehkai pyrshah ïa ka Kyrgyz Republic, hynrei ngi sngewkmen ban ïoh ïa ka jingjop ha kaba kut. Ka la ai jingmyntoi bha ïa ngi ban jam sha ka jingïalehkai kaba khatduh,” la bynrap ka Julan.
Ka Kyrgyz Republic ka la wanphai da kaba pynliem ïa ka Uzbekistan da 2-1 kol ha ka jingïalehkai kaba ar ha ka sngi Balang. Kane ka mut ba ka India ka dang lamkhmat ïa ka Group jong ki lai tylli ki kynhun namar ka rekod jingjop ïa ka Kyrgyz Republic (head to head), bad ka shi point pyrshah ïa ka Uzbekistan kan pynlong ïa ki ban pynthikna ïa ka tiket sha China ha u snem ban wan.
Wat hapdeng ka jingjop, u coach rangbah Joakim Alexandersson u la pynpaw ïa ka jingbym sngewhun ïa ka rukom ïalehkai ha baroh kawei ha ka jingïakhun kaba nyngkong, hynrei u la pynthikna ba ka jingssngew skhem jong ka kynhun ka dang neh.
“Ngim shym la lah ban ïalehkai thik kumba ngi kwah. Ngi la mad jingeh ha kiba bun ki khep jong katei ka jingïalehkai. Hynrei ha ka kylla miet, ngi la kham pyndonkam bha ïa ki lad na ki liang (kamon & kadiang), ban thaw katto katne ki kabu kiba paka. Watla ka rukom ïalehkai kam shym la long kaba pura, hynrei ngi sngewkmen ban ïoh ïa ki lai tylli ki point, kiba nga pyrkhat ba ngi dei hok ban ïoh,” la ong u Alexandersson.
Haba kren shaphang ka liang pyrshah ba ki thei ïalehkai jong u kin ïa aireng, u Alexandersson u la ong, “Ka Kyrgyz Republic ka long ka kynhun kaba kham khlaiñ ha ka bor met, hynrei ka Uzbekistan ka kham ïalehkai bha ban tehlakam ïa ka bol.
“Nga thikna ba ka Uzbekistan kan kwah shisha ban khie im biang, kumta nga khmih lynti ba kane kan ym long ka jingïalehkai kaba duna hynrei kaba jwat na ka bynta jong ngi. Ngin sa ïoh kham bun ka por pynjahthait bad kham bun ki sngi ban pynkhreh ban ïa ki, kaba dei ban long ka jingmyntoi ha ka rukom kaba thikna, hynrei phim ju tip. Ka dang don kawei ka jingïalehkai kaba dang sah, bad kin ïakhun tyngeh ban ïoh khur pura ïa ki lai point.
“Ngin ïakhun beit na ka bynta ka jingjop. Kam don jingmut ban shong bad ïalehkai na ka bynta ka jingïakhaid. Barabor kane ka long kaba ma. Kumta ngin pyrshang ban ïalehkai la ka jong ka jong ka jingïalehkai bad ban ym pyrkhat than ïa ki jingjia. Baroh ki don ha ki kti jong ngi,” la pynthikna u coach.
Tang ar bnai tam mynshwa, u Alexandersson ula ïalam ïa ka kynhun U20 ban ïohrung sha ka AFC U20 Women’s Asian Cup, kaba la pynkut noh ïa ka jingap kaba la neh 20 snem. Mynta, une u Coach uba na Sweden u shem ïa lade ha ka tduh jong ka burom kaba kham khraw bad ban pynkut ïa ka jingap khmihlynti kaba la neh slem. Ka sien ba khatduh ba ka India ka la ïakhun ïa ka AFC U17 Women’s Championship ka dei ha u snem 2005, ha kaba ki don 11 tylli ki kynhun kiba la ïashim bynta khlem ka jingïaknieh rung. Hynrei naduh ba la pyntreikam ïa ka lympung ïaknieh rung, ka India kam pat ju rung ha ka thup ki kynhun ba kynsai jong ka Asia.
U Alexandersson u tip thikna haduh katno kane ka lah ban long ka jingkyntiew kaba khraw ym tang ïa ki khynnah kynthei U17 hynrei ïa ka phutbol kynthei ha India, khamtam hadien ba ka kynhun ba la rangbah ruh ka la ïoh ban rung sha ka Asian Cup 2026 ha ka sien kaba nyngkong eh.
“Nga sngewkmen shibun lada ka kynhun U17 ka lah ban pynurlong ïa kane ruh kumjuh. Kan mut shibun na ka bynta ki snem ban wan jong ka phutbol kynthei ha India — ban ïohi ym tang ïa ka kynhun ba la rangbah, hynrei wat ïa ki kynhun U20 bad U17 ba kin poi sha kane ka kyrdan. Kyrmen ba kan ai mynsiem shuh shuh ïa ki khynnah kynthei ha kylleng ka ri India ban shim ïa kane ka jingïalehkai kaba itynnad.”