SHILLONG, Risaw 16: U Myntri Rangbah jong ka Jylla Meghalaya u Conrad K. Sangma, ha ka sngi Palei, 16 tarik Risaw, ula plie paidbah ïa ka Synthetic Football Turf ba dang shna thymmai ha Madan Centre Playground, Kharbuli, Nongkrem ha East Khasi Hills, ha ka jingïadon lang u Myntri ka tnat ïalehkai u Bah Wailadmiki Shylla.
Kane ka projek kaba la seng nongrim ha u snem 2021, ka dei ka jingkyntiew kaba khraw na ka bynta ka kam ïalehkai ha katei ka thaiñ.
Ki riew pawkhmat kiba la don lang ha kane ka sngi plie ïa kane ka madan ki long u MLA barim u Bah Lambor Malngiang, u Dr. Balajied Sing Syiem, u Syiem ka Hima Khyrim, Manhiam Marbaniang, Chief Engineer, State Sports Council Meghalaya, bad kiwei kiwei.
Haba ai jingkren ha kane ka sngi, u Myntri Rangbah ka jylla u la pynpaw ïa ka jingkmen halor ka jinglah ban pyndep ïa kane ka madan bad u la ong ba kane ka pyni ïa ka jingangnud jong ka Sorkar ban thaw ïa ki lad na ka bynta ki khynnah samla. U la kdew ruh ba ka Meghalaya ka don bun ki samla bad u la ban jur ïa ka jingdonkam ban bei tyngka ha ka pule puthi, ki kam ïalehkai, bad ki jingtei ban ïarap ïa ki ban kiew bad ban seisoh.
“Ka jingïalehkai ka hikai ïa ka jinglong ryntih, ka jingtrei shitom bad ka jingïatreilang. Ha kine ki hynñiew snem ba la leit noh, palat 70% na ki jingtei ïa ki jaka ïalehkai jong ngi kiba mynta la ïoh ban pynbha,” u la ong.
U la bynrap ba ka Sorkar ka shim ïa ki sienjam ban kyntiew ïa ka kam ïalehkai ha ka kyrdan ba shapoh (grassroots level) da kaba pynlong ïa ki block-level league bad ki lympung ïalehkai kiba pynïasoh ïa ki samla bad pynshlur ïa ka jingim kaba koit ba khiah. U la kyntu ïa ki samla pule bad ki samla trai shnong ban pyndonkam ïa kane ka jaka thymmai da ka jingkitkhlieh bad ban pyndonkam hok ïa ka ban kyntiew ïa ka sap kaba ki don.
Na ka liang jong u Myntri ka tnad ïalehkai, u Bah Wailadmiki Shylla, u la ïaroh ïa ka jingthmu jong u Myntri Rangbah ka Jylla bad ka jingïashim bynta kaba shitrhem ban wanrah ïa ki kam pynroi. U la pynpaw ïa ki prokram bapher bapher jong ka sorkar kiba kyrshan ïa ki nongïalehkai, ki samla nongseng kam seng jam, ki nongtem lyngba ki jinghikai, jingïarap pisa, bad ki lad kamai.
U la kren ruh shaphang ka jingpynkhreh jong ka Meghalaya ban pdiang ïa ka National Games ha u snem 2027, kaban ai ïa ki nongïalehkai ban ïoh ïa ka jingshemphang kaba kham bha sha ki jaka ïalehkai kiba pawnam ha ka pyrthei.
Kumjuh ruh na ka liang u MLA barim ka thaiñ, u Bah Lambor Malngiang u la ai khublei ïa u Myntri Rangbah ka Jylla uba la mynjur ïa kane ka projek ha ka por jong ka khlam COVID-19 bad ai khublei ïa ka jingkylla kaba paw naduh ba la seng ïa ka nongrim ha u bnai Nohprah 2021. U la pynpaw ïa ka jingsngewnguh ïa ka jingkyrshan kaba ïai bteng jong ka sorkar na ka bynta ki jingtei bad ka jingpynroi ïa ki samla ha ka thaiñ.
La pynkut ïa kane ka jingïalang da ka jingai khublei na u Headman ka Kharbuli, u Bah C. Kharbuli, uba la ai khublei ïa u Myntri Rangbah ka Jylla, ki Myntri, bad ki ophisar kiba la ïalam bad ai jingkyrshan.
La khmih lynti ba kane ka madan thymmai kan kyntiew ïa ka phutbol bad ki kam ïalehkai ha Nongkrem bad ki jaka ba marjan, kaba ailad ïa ki samla ïalehkai ïa ka rynsan kaba mynta ban pyntbit bad pyni ïa ka sap ka phong jong ki.
