Sospon ka KHADC ïa u Lyngdoh Sohïong, thung da u Bah C. Pohlong kum u Administrator

Shillong, Nohprah, 02: Ka Khasi Hills Autonomous District Council (KHADC) ha ka Sngi Thohdieng ka la pynmih da ka hukum ba la pynsangeh noh shipor ïa ka jingtreikam jong u Bah Bashemphang Thabah kum u Lyngdoh jong ka Hima Sohïong.
Ha ka hukum ba la soi da u Dy. Secretary ka KHADC, la ong ba ka jingpynsangeh noh shipor ïa ka jingtreikam jong u Lyngdoh ka Hima Sohïong ka long katkum ka kyndon 6 jong ka United Khasi-Jaiñtia Hills Autonomous District (Appointment and Succession of Chiefs and Headmen) Act, 1959.
Katkum kane ka hukum ka KHADC ka la thung ïa u Deputy Secretary jong ka Executive Committee u Bah C. Pohlong kum u Administrative Officer jong ka Sohïong Lyngdohship ban pynïaid shipor ïa ka synshar ka khadar katkum ka kyndon 18 jong ka United Khasi-Jaiñtia Hills Autonomous District (Appointment and Succession of Chiefs and Headmen) Act, 1959 tad haduh ban da pynbna da kumwei pat.
U Chairman jong ka Joint Action Committee ki Khun ki Hajar ka Hima Sohïong u Bah Purningstar Shabong u la ong ba ka Committee ka la ujor pyrshah ïa u Bah Bashemphang Thabah hakhmat ka KHADC naduh u snem 2019 halor ka jingkynnoh ba u donkti ban leh be-aiñ be-riti ha ka synshar ka khadar hapoh ka Hima Sohïong.
“Katkum ka Sanad ba ka District Council ka la ai ha u Bah Bashemphang Thabah ka la bthah ba u dei ban ai jingkheiñ manla u snem hynrei um shym la pynbiang satia ïa kata. Nalor kata, ka District Council ka la bthah ruh ban thung ïa u Public Information Officer (PIO) hynrei u Bah Bashemphang Thabah um shym la thung satia bad ha ka por ba ngi la pan ïa ka hok wad jingtip (Right to Information) u la shu soi hi dalade kum u PIO.” la ïathuh u Bah Shabong.
U la ong shuh shuh ba ki bun ki daw kiba la pynlong ïa ka District Council ban sospon ïa u Bah Bashemphang Thabah halor ka jingbym ioh syrnot jong ki Rangbah Shnong bad ka jingthurmur u pud u sam jong ka Hima bad kiwei kiwei de ki daw kiba ka JAC ka ju ujor na ka por sha ka por.