Shillong, Nohprah 01: U Myntri Rangbah ka jylla uba long ruh u President rangbahduh ka National People’s Party u Conrad K Sangma ha ka sngi Thohdieng u la kyntait ba u don jingthmu ban ïakhun noh na kawei pat ka constituency bad ieh khunswet noh ïa ka South Tura ban leit ïakhun noh pat na Selsella bad ruh u la kyntait ba u thmu ban ïakhun na ki ar tylli ki constituency.
Haba ïakren bad ki lad pathai khubor u Conrad Sangma u Conrad u la ong ba ka South Tura ka dei ka constituency kaba u mihkhmat mynta un ïakhun biang beit ruh tang na katei ka constituency ha ka ilkeshon 2023.
“Nga kren da kaba shai ba kumba long mynta halor kane ba ngan ym iehnoh ïa ka South Tura ban leit ïakhun sha kawei pat ka constituency bad haba ïadei bad ka jingïakhun na ar tylli ki constituency kam pat don eiei ka rai bad ka party ruh kam pat shim rai bad nga sngewskhem ruh ba ngan jop biang na South Tura namar nga la trei shitom kum u MLA ka constituency,” u la ong.
Haba kylli halor ka jingmih ka khubor ba ka jingphet noh ka Ferlin C. A. Sangma ka MLA ka NPP na Selsella sha ka BJP ka dei hadien ba ka la mih ka khubor ba ka lah ban duh tiket namar Conrad un ïakhun hi noh na katei ka Constituency, u Conrad u la ong ba kumba long mynta na ka liang jong u kam pat don satia ka jingpyrkhat kaba kum kata bad kumjuh ruh ki nongtrei party na katei ka constituency.
U la ïathuh ruh ba ka jingphet jong ka Ferlin na ka NPP kan ym don jingktah satia namar ka party ka la don ki briew kiba biang ban ïakhun na katei ka constituency.
Shuh shuh u Conrad ha u 2023 un hap ïakhun ïa u kyrtong ba snar bha u Bernard R Marak na ka BJP uba la jop ruh ïa ka ilekshon MDC ha u 2021 da ka jingpynrem ïa u kyrtong ka NPP uba u Conrad u la trei shitom ban ïalap ilekshon ban pynjop ïa u.
Lah ban kdew ba u Conrad u la jop nyngkong eh ïa ka ileskhon MLA kaba u ïakhun dei na Selsella ha u 2008 bad shah rem noh ha u 2013 ha u Clement Marak bad u u Clement u la jop biang ruh ha u 2018 hynrei namar ka jingkhlad ba shitengpor jong u la hap pynlong ïa ka ilekshon shiteng samoi ha u 2029 ha kaba ka Ferlin ka la jop na ka tiket NPP.
