Yn kyrshan ïa u Kyrtong ka Congress : Jied ka Para u Bah HDR Lyngdoh ka bynta ka Ri ban ïa u Hymmnen

Shillong, Nohprah 02: U Bah HDR Lyngdoh kumba long ha ka elekshon 2018, un mad biang ïa ka jingpyrshah na ka para jong u bad mynta ka kynti na i Kong Beauty Lyngdoh.
I Kong Bueaty, i la ong ba in nym kyrshan ïa la u hymmen, hynrei in kyrshan ïa u kyrtong jong ka Seng Congress, u Bah S. Osborne Kharjana ha kane ka elekshon 2023. “Ngam don kano kano ka jingpyrshah ïa la u hymmen, hynrei nga sngew ba katto ka la biang, U Blei U la ai ha i katto katto ka bor, ka burom ka spah ka phew”, i la ong haba ïakren bad ki nongthoh khubor.
Ka daw kaba i Kong Beauty i la pyni ba im kyrshan ïa u Bah HDR, ka long namar ba i ïohi ba ka ri ka donkam da ki nongïalam kiba stad kiban peit bad kit shisha na ka bynta la ka jong ka Ri, namar kine ki nongïalam ba mynta ki la die ïa la ka jong ka ri bad dei namar kaen ka daw ba ka Assam ka wan thombor.
“Nga la poi sha Kabri Anglong, nga la poi sha Mukroh, ki briew ki ong Kong duwai lem na ka bynta jong ngi ba ka Assam kan nym wan thombor shuh”, i la ïathuh.
Haba ai ïa ka daw ba in kyrshan ïa u kyrtong ka Congress, i Kong Beauty, i la ong ba in duwai na ka bynta jong u ba un nang kiew shaphrang ba un shakri hok ïa ka jylla bad ïa ki paidbah. Kharjana ka dei namar ba u dei u briew uba stad, ha kaba ka la ai ruh ka jingkyrkhu ia une u Kyrtong ka Congress.”Nga ngeit ba une u Samla un long u ka iktiar ba U Blei Un pyndonkam ïa u”, i la ong, da kaba bynrap ba kibabun ki briew ba wan nabar ki la ïaroh ïa ka jingitynnad bad ka jingriewspah ka mariang ha kane ka ri, hynrei namar ba ki nongïalam kim kitkhia ka long kumne.
I la ong ruh ba ki don kiba kren beiñ ïa i haba i leit kyrshan ïa u Bah Osborne, hynrei i la ong ba kiwei ki lah ban ïakhun da ka spah, hynrei ma i pat i shaniah ha u Blei. “Kiwei ki lah ban ïakhun da ka spah, nga te nga shaniah ha U Blei”, u la ong.
Lah ban pynkynmaw ba u Bah HDR Lyngdoh uba jop mynshwa kum u MLA ka Congress u la shah rem noh ha ka election 2018 namar ka jingbym ïoh jingkyrshan na ki para. Hynrei dang shen u la wan pynïasoh noh bad ka UDP bad ha ka sngi ba u la pynïasoh sha ka UDP mynta u snem u la pynbna ba ka ïing ka sem ka la ïatylli biang ban pynjop ruh ïa u ha ka election ban wan, bad ha katei ka sngi, i para jong u, i Kong Memory Lyngdoh bad u pyrsa jong u, u Bah Synshar Lyngdoh ki la wan pynïasoh lang sha ka UDP.