Shillong, Nohprah 02 : Ka Congress ka la sei da u ophisar ka tnad Custom uba bat ïa ka kyrdan Superintendent, u Bah S. Osborne Kharjana ban long kum u kyrtong ka party ha kane ka elekshon MLA ban long ha u 2023.
Haba kren ha ka jingïalang jong ki nongïalam na ki unit kaba la long mynta ka sngi ha Mawmaram, u Bah Osborne u la ïathuh ba ka jingrung jong u sha ka saiñpyrthei kadei namar kiwei ki jaidbynriew ka shah rkhie bein ha kiwei ki jaidbynriew ka ri India man la ka san snem kiba ju ong ba ki Khasi ki long kum ki tham namar ki ïatan para ma ki.
Da kaba pynshai shuh shuh ïa ka jingkren jong u ha katei ka sngi, u Bah Osborne u la ong ruh ba ha Meghalaya kaba don 60 ngut ki MLA hynrei haba la poi pat ka por ban thaw sorkar kiba long Myntri Rangbah ki dei beit na rilum Garo kaba don tang 24 tylli ki constituency ym na rilum Khasi kaba don haduh 36 constituency.
Ha katei ka jingïalang la wan da ki spah ngut ki nongkitkam jong ka party na ki unit bapher bapher jong ka Sohïong kynthup ïa ka para trai jong u Bah HDR Lyngdoh, Kong Beauty Lyngdoh nalor kiwei kiwei.
Lah ban kdew hangne, ka Congress hadien ka jingphet noh jong u Bah HDR Lyngdoh sha ka UDP ka la wad da kiwei pat ki kyrtong bad ha katei ka jingwad kyrtong ka la ïoh da utei u ophisar ka tnad Custom u ba la mynjur ban aireng.
Tad haduh mynta ki kyrtong kiba la thmu ban aireng na Sohïong ki kynthup ïa u MLA ba mynta, Bah Samlin Malngiang uba lah ban ïakhun na ka NPP, nangta u MLA barim Bah HDR Lyngdoh na ka UDP bad u Bah Osborn na ka Congress.
