Soi soskular ka Sorkar MDA bad ka SpiceJet ban pynher liengsuiñ na Shillong sha Delhi

Shillong, K’lyngkot, 14: Ka Meghalaya Transport Corporation (MTC), jong ka Sorkar Jylla, ha ka sngi Saitjaiñ ka la ïasoi ïa ka soskular bad SpiceJet na ka bynta ban sdang noh ïa ka jingpynher liengsuiñ na Shillong sha Delhi.
Ka jingpynher liengsuiñ kan long tang ar sien shitaiew, kata tang ha ka sngi Lah Sngi U Blei bad ha ka sngi Thohdieng.
Lah ban kdew hangne ba ka jingpyrshang ban sdang ïa ka jingpynher liengsuiñ na Delhi-Shillong-Delhi ka dei kaba la shimkhia da ka Sorkar Jylla ha u snem 2020. Ha ki snem baladep, ka jingpynher liengsuiñ ka long tang ïa ka Big Charter Pvt Ltd (FlyBig).
Ka FlyBig ka la phah da ka liengsuiñ Bombardier Dash 8 Q400 ban kit ïa ki nongleit jingleit da kaba shim wai na ka SpiceJet. Hynrei na ka liang jong ka FlyBig ka la pynpaw ïa ka jingbymlah shuh ban dang bteng ïa ka jingpynher liengsuiñ. Mardor ka Sorkar Jylla ka la pynlong ïa ki jingïasyllok bad ka FlyBig bad ailad ruh ban wad ïa ki lad ki lynti. Hynrei namar ka jingbym lah shuh jong ka Flybig ka Sorkar ka la hap ban pyndam noh ïa ka jingïasoi soskular bad kane ka kompeni pynher liengsuiñ.
Na ka liang jong ki bor pynïaid ka SpiceJet kiba ïakren bad ka Sorkar Jylla bad tyrwa ban pynher ïa ka liengsuiñ ban kit ïa ki nongleit jingleit na Delhi-Shillong-Delhi katkum ki kyndon ba la ïasoi bad ka MTC.
Ka SpiceJet ka don 23 tylli ki liengsuiñ Bombardier Dash 8 Q400. Ïa kane kajuh ka liengsuiñ yn sa kit ïa ki nongleit jingleit na Delhi-Shillong-Delhi.
La khmihlynti ba ka jingsdang ban kit ïa ki nongleit jingleit kan long naduh u Rymphang, 2023.
Ka SpiceJet ka la buh ïa ka thong ban pynurlong katkum ka soskular ba la ïasoi bad ka Sorkar Jylla bad ban pynurlong ïa ka jingangnud jong ki paidbah nongshong shnong ka jylla Meghalaya da kaba kit tista ïa ki nongleit jingleit na Shillong sha Delhi.