Plat 5000 ngut poi shim bynta ki paidbah ha ka jingïalang u Dr Mukul ha Tikrikilla

0

Tura, K’lyngkot 14: Ka jingïoh jingkyrshan jong u Dr Mukul Sangma kum u kyrtong ban ïakhun na Tikrikilla constituency la lah ban sakhi ha ka jingïalang paidbah kaba la pynlong ha ka sngi Saitjaiñ ha Tikrikilla ha kaba palat 5000 ngut eiei ki paidbah ki la wan sha kane ka jingïalang ban sngap ïa ka jingkren bad ki jingpynshai kiba u Dr Mukul sangma ryngkat bad kiwei ki nongïalam ka TMC ki don ban pynshai sha u paidbah.
Haba kren ha kane ka sngi u Dr Mukul u la pynpaw ïa ka jingsngew myllung mynsiem ban ïohi ïa kane ka jingwan kyrshan ki paidbah da kaba wan shim bynta ha ka jingïalang wat la ha ka jingshisha ka dei ka por ba bun ki tamasa kum ka Bihu bad kiwei.
U la ong ruh ba kumba ka ri India la seng ha u païa ka jingïatylli wat hapdeng ka jingbym ryntih bad kumba ka jylla ruh ka dei kaba shong ym tang kawei ka jaidbynriew hynrei ka jinglah ban tehsong ka dei namar la tehsong lang ïa baroh da ka jingieid bad jingburom ba markylliang.
“Ka ri jong ngi ka dei ka ri kaba shong da ki jaid bynriew kiba pher bad ki jingngeit ruh kiba bun jait hynrei ngi ïa tylli wat hapdeng ka jingbym ryntih bad kumju kane ka jïa ruh ha ka jylla ka dei namar ki kpa tymmen jong ngi ki la ai pateng ba ngin ieid bad burom mar kyllïang bad kane hi kan dei u sai hon sha ka lawei ba phyrnai jong ka jylla. Ka dei ruh ka kamram jong ngi ban trei ban kynjoh sha kane ka thong bad dei na kane ka daw ba kum ka party ngi don hangne,” u la ong.
Shuh shuh u la kyntu ïa ki paidbah ba kin long ki atiar ka jingkylla da kaba rai na ka vote ba khlaiñ bor jong ki.
“Lada phim hun ïa kaei kaba ki nongïalam jong ngi ki trei, ka don ka kabu ban wanrah jingkylla da kaba kin pyndonkam ïa ka atiar ba la pynkupbor lyngba ka shi vote ban wanrah ïa ka jingkylla kaba phi angnud,” u la ong.
Ha kane ka sngi kumba 60 ngut ki nongïalam jong ka NPP ki la wan ban pynïasnoh sha ka TMC ban kyrshan ïa u Dr Mukul ha kane ka elekshon ban sa wan.
Shuh shuh ha kane ka sngi la wan shim bynta lag ruh da ki nongïalam ka party kiba kynthup ïa u State General Secretary ka party u Mukul Das, Dr. Mizanur Rahman Kazi bad Dr. Prabir D Sangma.
Lah ban kdew ba u Dr Mukul ha kane ka elekshon kaba mynta un aireng na Tikrikilla nalor ka Songsak kaba dei ka constituency kaba u jop kum u MLA ha u 2018.

Leave A Reply

Your email address will not be published.