Ngin bud ïa ka jingbthah ka ECI ban ai jingtip ïa ki kyrtong ba don dak sniew : Chandrasekhar

Shillong, K’lyngkot, 14: U Myntri Khynnah ka Sorkar Pdeng uba peit ïa ka Skill Development and Entrepreneurship and Electronics & Information Technology u Rajeev Chandrasekhar ha ka sngi Thohdieng u la ong ba ka Bharatiya Janata Party kan sa bud ryntih ïa ki jingbthah jong ka Election Commission of India da kaba ai jingtip ïa ki kyrtong ka BJP kiba la don dak sniew.
“Kane ka dei ka bynta kaba kongsan tam mynta la bun bun snem na ka bynta ki kyrtong kiba hap ban ai jingtip kata shwa ka elekshon. La ka long ha Karnataka, ha Pondicherry, ha Gujarat, ha Uttar Pradesh ngi hap ban bud ïa ki kyndon kiba la buh da ka Election Commission,” u la ong ha ka jingïakren bad ki lad pathai khubor.
Haba pynpaw ba ka thong jong ka BJP na ka bynta ki paidbah ka jylla Meghalaya ka long kaba kham pher, u Chandrasekhar u la ong, “ngi don hangne ban ai ka jingshakri ïa ki paidbah ka Meghalaya bad ban ïatreilang na ka bynta ban wanrah ïa ka lawei kaba phyrnai bad ïa ki paidbah bad ki nongthep vote ka jylla Meghalaya ban shah skhor ïa kata lane ban shah rong noh ha ki jingshim kabu saiñpyrthei da ki seng saiñpyrthei lane da ka party kaba wan na West Bengal. Kane ka long na ka bynta ki paidbah nongthep vote ka Meghalaya ban ai ïa ka rai.”
“Ngin nang trei shitom ban ïoh ïa ka jingshahniah na ki paidbah,” ula bynrap.
U la ong ba ka BJP hapoh ka jingïalam jong u Myntri Rangbahduh Narendra Modi ka Meghalaya ka don ïa ka lawei kaba phyrnai ban ïa kino kino ki seng saiñpyrthei kiba la don lypa nadun 50 snem mynshwa.
“La ka dei ka party rim lane ka party kaba dang shu lap ha dang shen ba ha West Bengal ka khih phaloh namarkata ki hap ban peit nuksa na kiwei ki jylla, nga ngeit ba ngin sa lah ban leh ïa kaba bha tam bad ban shakri khambha ïa ki paidbah jong ka Meghalaya bad kata ka dei ka jingthmu jong ngi bad ngi kyrmen ba ki nongthep vote ruh kin ailad ïa ngi ha kane ka kynti,” la ong shuh shuh u Chandrasekhar.