Pyllait paidbah ka Meghalaya ïa ka Helpline jong ka State Mental Health
Ban pynsuk ïa kiba shah ktah ha ka bor pyrkhat
Shillong, K’Lyngkot 14 : Ka sorkar Meghalaya hynnin ka sngi ka la pyllait paidbah ïa ka Helpline jong ka State Mental Health lyngba u – 14410, ha kaba ki paidbah ki lah ban phone ban ïoh ïa ka jingsyllok haba ki ïa kynduh ïa kum kitei ki jingshitom.
“Kadei ka sngi kaba khraw na ka bynta jongngi, namar kadei hadien shibnai ba ngi la wanrah ïa ka State Mental Health Policy, mynta pat ngi la lah ban wanrah bad pyntreikam ïa une u Mental Health Helpline, kaba long ka sien pyrshang kaba radbah bha ban ai ka jingshakri na ka bynta ki nongshong shnong kiba donkam ïa kitei ki lad jingïarap ha ka por kaba biang,” ong u Myntri ka tnad ka Koit ka Khiah ka sorkar jylla, James K Sangma ha ka sngi ba pyllait paidbah ïa utei u helpline ha ryngkat ka jingdonlang u P. Sampath Kumar, IAS, Principal Secretary, Kong RM Kurbah, IAS, Secretary, Ramkumar S, IAS, Mission Director ka National Health Mission, Dr. YA Phira, CEO, State Mental Health Authority, Meghalaya bad Dr. SS Nongbri, Director, DHS (MI/MCH&FW) cum Jt. MD of National Health Mission, Meghalaya.
La pynbna ruh ba utei u numbor bym donkam siew ei ei haba phone, un treikam naduh ka por 10.00 baje mynstep haduh ka por 5:00 baje janmiet naduh ka sngi Nyngkong haduh ka sngi Thohdieng ha kaba ki paidbah ki lah ban ïoh ïa ka jingshakri ha ka ktien Khasi, Garo, Pnar bad ruh ha ka Hindi lane English kum ka ktien ïa kren.
La pyntip ruh ba kin don haduh 50 ngut ki riewshemphang kiba lah ban ïa syllok ha kylleng ki distrik lyngba katei ka helpline. Ha kajuh ka por, katei ka helpline kan treikam ruh baroh 24×7 bad kan poi lang ha ka Tele-MANAS Network (Tele Mental Health Assistance and Networking Across States) jong ka sorkar pdeng.
La ong ruh ba kito kiba phone yn pynïasoh pat bad ki sha kito ki stad ba dei peit kyrpang ne ki specialist kum ki psychiatrist, social worker, ki nos lane ki psychologist katkum ka jingdonkam. Lada jia ba ki paidbah ki kwah ban kynduh markhmat, lah ban pynbeit ba kin leit mih sha ki health and wellness centre lane sha ki primary healthcare kumjuh sha ki tertiary healthcare
Dang ha u bnai Nohprah, ka Meghalaya ka kylla long ka jylla kaba nyngkong ha ka thain shatei lam-mihngi jong ka ri bad kaba lai ha ka Ri baroh kawei ban don la ka jong ka Policy ba kyrpang na ka bynta kito kiba don jingthut ha ka bor pyrkhat, da ka thong ban ai ka jingïarap bad ka kyrshan lang na bynta jong ki.