Ki jong ngi ha ka sngi thep Vote ki leit bam piknik, ngam kwah ba kane ka rukom kan bteng: Sanbor

Shillong, K’lyngkot 14: U MLA jong ka South Shillong uba dei ruh u Myntri ka sorkar jylla u Bah Sanbor Shullai, ha ka sngi Saitjaiñ u la kren bynñiaw halor ka jingbym pyndonkam hok ki paidbah Khasi khamtam eh kiba shong ha ka Constituency jong u ban pyndonkam ïa ka iktiar ba khlaiñ bor jong ki ha ka synshar paidbah da kaba leit ban thep ïa ka vote jong ki. U la ong ba wat la ka sorkar jylla bad sorkar India bad ki tnat treikam baroh kiba don ha ka jylla ki ai shuti ha ka sngi thep vote hynrei ha jaka ban leit tyhep vote bunsien ki leit bam piknik pynban sha lum sha wah.
Haba kren ha ka jingplie ïa ki maw kyrteng sah nam ïa ki surok kiba la ai nam ha ki riew khraw bad ki riew rangbah jong ka dorbar Shnong Laban, u Bah Sanbor u ong ba ka jingkhlaiñ bor jong ki paidbah ban rai ha ka synshar khadar ka dei ha ka por elekshon da kaba kin leit thep vote ïa uno u kyrtong uba ki mon ban mih khmat hynrei ki Khasi bunsien ha jaka ban pyndonkam hok ïa kane ka iktiar ki kheiñ dew thala pynban da kaba ki leit kai lei muja bam piknik ha ka sngi thep vote.
“Ka sorkar bad ki ophis baroh ki ai shuti khnang ha ka sngi thep vote khnang ba u paidbah un ïoh lad ban leit thep vote ki jong ngi ha jaka ban pyndonkam ïa ka iktïar ba la pynkupbor ki rah khiew rah syiar pynban sha lum sha wah ban leit bam piknik bad kane ka jingleh jong ngi kum ka jaidbynriew kam dei ban bteng satia ha kane ka elekshon ban wan,” u la ong.
U la bynrap shuh shuh, “Lada ngi peit ha ka elekshon MDC ha u 2019 ha kaba ki nongthep vote jong ka Laban ruh ki dei tang ki Khasi katba tang 40 na ka 100 kiba leit ban thep. Lada phi peit kiwei ki jaidbynriew wat kiba la tymmen ruh ki phah rah ban pynpoi sha ki jaka thep vote ba kin ïoh pyndonkam ïa ka hok jong ki bad nga kwah ba ki jong ngi ruh kin shim nuksa na kiwei ki jaidbynriew halor kane ka bynta khamtam ba mynta lei kiba pang bad ki tymmen ki kro ki lah ban thep vote wat na iing ne kamra ba ki thiah pang ruh.”
U la ong ba kum u nongmih khmat uba ki paidbah ka Laban ki la jied u trei shitom shibun eh ban pyndep ïa ka kamram kaba ki paidbah ki la bynshet ha u kum u MLA ha kaba wat ka pisa kba ka sorkar ka mang na bynta man uwei pa uwei u MLA ba un leit kai sha kiwei kiwei ki ri ne jylla ruh um shym la pynlut kumba ki 59 ngut ki MLA ki leh namar ka jingban khia ka kam kaba u hap ban pyndep kum u MLA.
Ha kane ka sngi u Bah Sanbor u la plie ïa ki mawnam jong ki surok kiba la jer kyrteng ha ki riew rangbah jong ka shnong Laban ki kynthup ka surok ba la ai nam ha u Babu Hajom Kissor Sing Nongbri, Phinton Mylliemngap, Nomiwell Rynjah, Dennis Dunn, Moshondro Roy bad u Bringtong Mylliemngap.
Ha kane ka sngi la wan sakhi lang ïa kane ka jingplie da ki baha iing jong kine ki riew rangbah kiba la shah pynsahnam ryngkat ki nongïalam shnong bad ki paidbah nongshong shnong ka Laban.