Shillong, ïaïong, 27: Ha ka jingdonlang u Myntri Sorkar Pdeng ba dei khmih ïa ka Tnat Kam pohiing bad Coope-ration, u Amit Shah, la ïasoi ïa ka Memorandum of Settlement hapdeng ka Sorkar India, Sorkar Assam bad ki dkhot jong ka Dimasa National Liberation Army bad Dimasa Peoples’ Supreme Council (DNLA/DPSC) ha New Delhi mynta ka sngi.
U Dr.Himanta Biswa Sarma, Myntri Rangbah ka jylla Assam, ki heh ophisar na ka tnat Kam Pohiing jong ka Sorkar Pdeng bad Sorkar Assam ki la ïasonlang ha kane ka jingïalang.
U Myntri Kam pohiing jong ka Sorkar Pdeng, u Amit Shah u la ong ba kane ka jingïateh soskular ka long uwei u mawmer ban pynlong ïa ka thaiñ Shatei Lammihngi kaba lait na ki kam pyntriem shuwa u 2024 bad pynurlong ïa ka thong jong u Myntri Rangbah duh u Narendra Modi ïa ka thaiñ Shatei Mammihngi kaba shongsuk shongsaiñ bad kaba jop.
U la ong ba kane ka jingïateh soskular kan pynkut shisyndon ïa ki kam pyntriem bad lyngba kane, ym don shuh ki kynhun kieng atiar ha Assam mynta. U la ong ba u Myntri Rangbah duh u Narendra Modi u la buh hakhmat ïa ka thong ban pyllait na ki kam pyntriem bad kyntiew ïa ka thaiñ Shatei Lammih-ngi hakhmat jong ka ri .
U la ong ba hapoh ka jingïateh soskular, ki dkhot ka DNLA ki la mynjur ban kyntait na ki kam thombor, ki la aiti baroh ki tiar ïaleh, pynduh ïa ki kynhun ïaleh jong ki.
Ki la mih noh na baroh ki ktem ba shong ba sah ki dkhot ka DNLA bad ïasoh bad ka synshar paidbah katkum ka aiñ. Kumta katkum kane ka jingïateh soskular, palat 168 ngut ki dkhot jong ka DNLA ki la wan ïasoh bad ka imlang sahlang da kaba wan pyndem ïa ki tiar ïaleh jong ki.
U la ong ba ka jingïateh soskular kaba mynta ka sngi kan pynkut shisyndon ïa ki kam pyntriem ha Dima Hasao Distrik jong ka Assam. Hapoh ka jingïateh soskular, yn plie ïa ka Dimasa Welfare Council da ka Sorkar Assam ban ïada, pynnehpynsah bad kyntiew ïa ka imlang sahlang, ka deiriti.
Ka jinglong katkum ka ktien ïakren ban kot sha ki jingangnud kiba ïadei bad ka saiñpyrthei, ka ïoh ka kot bad ka pule puthi bad yn pynthikna ka jingphai-khmat sha ka roi ka par jong ki jaitbynriew Dimasa.
