Kwah u MLA barim ban pynbha ïa ka Tynghor Secondary School

0

Nongstoiñ, Ïaiong, 27: Ïa ka Tynghor Secondary School la plie ha ka 3 tarik Kyllalyngkot 2014 bad ka dei kawei na ki shlem ban saiñ dur ïa ka jingnang jingstad na ka bynta ki khun ki kti jong ki paidbah jong ki 19 tylli ki shnong kiba don ha katei ka thaiñ.
Kumta na ka liang ki paidbah nongshong shnong, kiba angnud ban kyntiew ïa ka pule puthi, ki kyntu sha ki bor ba dei peit ïa ka tnad pule puthi jong ka sorkar, ba kan phai khmat bad theh ki jingïarap.
Kum ban pynkynmaw ba Tynghor kaba dei kawei na ki shnong kiba la rim tam ha ka thaiñ Muliang bad ka dei ruh ka Headquarter jong ka Hima Jyrngam Sirdarship. Hynrei ka dei pat ka shnong ka bym pat don ïa ki surok kiba biang bad wat ka umbam umdih ruh kam pat da poi thikna haduh ki sngi.
U Bah K.P.Pangniang nongmihkhmat barim ka Rambrai Jyrngam Constiytuency u ba dei ruh na katei ka shnong, haba ïakren bad u nongthoh khubor u la ïathuh ba ha katei ka shnong la don ka Upper Primary School kaba la seng naduh lai phew snem mynshuwa. Hynrei kaba shu sah ha juh khlem lah ban kiew lano lano.
Kumta katkum ka jingïaid ka por, ki Nongshong shnong bad ki Nongpynïaid jong katei ka skul ki la sngew dei ban don noh sa ka Secondary School na ka bynta ban pynsuk ïai ki khun ki kti ban leit pule bad ban ïabeh ïa ka jingnang jingstad katkum ka juk.
U la ong ba dei halor katei ka nongrim, ba ki riew rangbah ban ki paidbah jong katei ka thaim ki la kheiñ duh bad rai kut ban plie ïa ka Secondary School, na ka bynta ban kyntiew shuh shuh ïa ka pule puthi ha ka thaiñ, watla kin don shibun ki jingeh ba kin ïa kynduh ha katei ka jingpyrshang jong ki.
U Bah Pangniang ha ryngkat bad ki riew rangbah jong ka thaiñ, ki la pynpaw ka jingangnud ban kner ki lad jingiarap na ka bynta kane ka skul ba la rim bha. U la kyntu ïa ka sorkar ba kan phai khmat lem sha katei ka Secondary School, na ka bynta ka jingmyntoi jong ki khun ki kti jong ki nongshong shnong ha katei ka thaiñ baroh kawei.

Leave A Reply

Your email address will not be published.