Lum ka HITO ïa ki nongïalam shnong ban tehlakam ïa ki kam sniew

0

Nongstoiñ, Ïaiong, 27: Namar ka jingnang jyllei ki kam sniew khamtam ka jingjyllei ki nongdie bad nongdih drok hapoh ka thaiñ Mawshynrut, ka Seng Hynñiewtrep Integrated Territorial Organisation (HITO) Mawshynrut Circle, ka la lum ïa ka jingïalang bad ki nongsynshar shnong ka thaiñ Riangdo ban ïathir ïatai bad ban phylliew jingmut kumno ban rat dyngkhong ïa kine ki jingdih pynbuaid kiba shyrkhei.
Ha kane ka jingïalang kaba la ïoh ban pynlong hapoh ka Hall jong ka shnong Riangdo, la wan ban ïashim bynta lang da ki nongsynshar shnong ka thaiñ Riangdo ba kynthup naduh ki Sordar bad Secretary Shnong, ki riew rangbah ki samla bad kiwei kiwei, ban ïa phylliew jingmut lang bad ban shim ruh ïa ka rai kaba bha tam na ka bynta ban rat dyngkhong ïa u drok bad shibun ki jingsniew hapoh ka dong ka thaiñ.
Nalor u drok, ha kane ka jingïalang ka Seng HITO ka la wanrah ruh sa lai tylli ki mat ban ïatai kata ka long ban teh lakam ïa ka jingwan rung kyrthep ki bar jylla, ban pyrkhing ïa ka jingïashongkha khleh bad ki bar jylla bad ban pyrkhing ïa ki khynnah skul ba kin nym ïaid lyngkar.
Hadien ka jingïatai kaba sani bha, ka Seng HITO Mawshynrut ka la shim ïa ka rai ban ïatreilang bad ki bor synshar shnong ka thaiñ Mawshynrut. Na ka liang jong ka Seng kan sa shong pyrkhat ruh halor kumno ban jam shakhmat, na ka bynta ban ïakhun ïa kitei ki jingsniew bad jingma kiba ap ïa ki paidbah ka thaiñ Mawshynrut.

Leave A Reply

Your email address will not be published.