Myntoi ki paidbah ka Mawpait Tlongpleng na ka Free Medical Health Camp ka HYC
Mawkyrwat, Ïaïong 27: Ka Hynñiewtrep Youths’ Council HYC jong ka Mawpait Tlongpleng Unit ha ka 26 tarik u Ïaïong, 2023 ka la pynlong ïa ka ‘Jingai jinghikai halor ka khuid ka suba bad kumjuh ruh ka jingsumar ei ïa kiba pang’ (Awareness-cum-Free Medical Health Camp) ha ka Shnong Mawpait Tlongpleng, South West Khasi Hills District ha kaba ki paidbah nongshong shnong kumba lai spah ngut ei ei ki la ïoh jingmyntoi.
La pynïaid ïa ka jingïalang da u Bah Marius Nongsiej, President ka HYC Mawpait Tlongpleng Unit bad bud sa ka jingkren lyngkot na u Myntri jong ka shnong, u Bah Donboklang Kharlyngdoh, ki jingkren lyngkot na ki Doctors kiba la wan ba ai jinghikai shaphang lai tylli ki mat kata ka jinglehkhuid, ka jingsniew na ka jingdih buaid bad ka jingktah na ka shongkha khynnah.
U Bah John Lyngdoh, In-charge ka HYC, South West Khasi Hills haba ai jingkren kum u Kongsan u la ong ka koit ka khiah kadei ka spah bah ba ngim lah ban thied da lei lei ruh. Shuh shuh u la ban ba ka jingshong kha khynnah kam ktah tang ïa ka koit ka khiah hynrei ka ktah ruh ïa ka jingangnud, kum ka nuksa lada kylli por dang khynnah aïu phi kwah ban long da la heh la san, kin jubab ba kwah long doktor kwah long ophisar hynrei kumno kin leit poi sha katei ka thong, lada kin ïoh lok noh ha ka arta kaba dang khynnah.
Kum u nongïalam u la ai ruh ka jingkyrkhu kyrdoh ïa ka unit ba ka la pynlong ïa kum kane ka prokram kaba tei bad ka la long shisha ka jingmyntoi ïa ki paitbah jong kane ka shnong, ba ha jaka ba kin leit shim dawai na ki doktor na Ranikor ne Mawkyrwat CHC mynta phi la shim na nangne na shnong hi.
Ka Doktor Irene Wan-niang, RBSK MO Ranikor CHC haba ai jingkren shaphang ka jinglehkhuid i la ong ba ka ka jinglehkhuid ka long kaba donkam tam ha ka jingim jong ngi kaba man la ka sngi, haba ngi leh khuid ngi lait na ki jingpang jingshitom. I la ong ruh ba haba lehkhuid kam dei ban long tang ha kyrpong ïing lajong bad sa bret kulmar sha ki ïing jong ki para marjan ne ha ki lynti shnong ïa ki ñiut ki ñier. I la hikai ruh ïa ki kmie ki kpa ban pynsum pynsait man ka sngi ïa la ki khun, kumjuh ruh ban pynmlien ïa ki khun ban shut bniat mar sien khie thiah.
Ka Doctor D. Kharbhih, MHO Mawkyrwat CHC haba ai jingkren shaphang ka jingktah na ka jingdih buaid i la ong ba kaba nyngkong ka ktah ïa ka koit ka khiah, kaba ar, ka jingdih buaid ka pynkyrni bad lada u kpa u kyrni, ha ki jingdih buaid kamut ka ïing ka sem, ki khun ki kti kin duna ka bam ka dih, ka pule ka dangle bad hangta poi sa ka pra ïing pra sem.
U Doctor Kyntiewnam Mawlong, MHO Ranikor CHC haba ai jingkren shaphang ka jingktah na ka shongkha khynnah u la batai shwa ba ka arta ban shongkha ka long 18 shaneng ia ka kynthei bad 21 snem shaneng ïa u Shynrang. U la ïathuh shuh shuh ba katkum ka statistics na ka tnad ka koit ka khiah, ki high risk pregnancy (mortality rate) ne kiba khlad na ka jingarmet ha ka arta khynnah ka khambun hapoh ka Jylla. U la ong shuh shuh ba ha kine ki sngi ba mynta ka aiñ POCSO ka kem bad set phatok ruh ïa ki khynnah kiba shongkha ha ka arta kaba dangrit.
Nalor kitei ki lai ngut ngut ki doctor ba la ai jingkren la ïadonlang sa i Doktor D. Suting na Mawkyrwat CHC, Dr P. Khardewsaw, RBSK MO na Ranikor CHC bad u Doktor G. Nongsiej, MO Ranikor CHC.
Ha kane ka sngi ka HYC Mawpait Tlongpleng ka la pynlong ruh ïa ka jingtam bad pynkhuid ïa ki jakhlia ne ka Clean and Pick up Program ha kaba 18 ngut ki khynnnah ki la wan ban ïashimbynta shitrhem da kaba tam ïa ki ñiut bad thep ha plastik, bad uba ïoh ïa ka jingkhia ba bun kilo u la long u nongjop.
Ka unit ka la sam da ka synod bad ka song pisa ïa ki khynnah kiba la jop ha kane ka jingïakop, i ba jop ba nyngkong i long i Amrita Syiemlieh 17.8 kilo, ba ar i-dei i Lapynkmen Syiemlieh 13.7 kilo bad uba wan ba lai u dei u Kevinson Snaitang 11.2 kilo.
Shwa ban sam ïa kane ka khusnam la ïoh ruh ban pule ïa ka jingkular shaphang ka jinglehkhuid na u General Secretary ka Unit, u Bah Toborlin Syiemlieh ha kaba baroh ki khynnah ki la bud ïa kitei ki kyntien jingkular.