Soi MOU ka bor synshar District ka Ri Bhoi bad ka SELCO Foundation ban kyntiew ïa ki jaka ai jingsumar ha Nongkyndong
Nongpoh, Nohprah 01: Ka bor synshar District ka Ri Bhoi mynta ka sngi ka la pyndep ban ïa soi ïa ka Memorandum Of Understanding (MOU) bad ka SELCO Foundation na ka bynta ban tei ïa ki Heath Sub Centre kiba dei katkum ka juk stad ba mynta ban nym shah ktah lada pynthud ka bor mariang ba ki nongtrei ka tnad ka koit ka khiah ki donkam ïa ka bording kaba thikna ban nym shah ktah ki paidbah ha ka pang ka shitom.
La ïa soi ruh ïa kane ka MOU hapdeng ka bor synshar District ka Ri Bhoi bad ka SELCO Foundation ka hadien shuwa ba ka SELCO Foundation ka hap ban tei ïa ki 8 tylli ki kamram pynkha khun (Labour and Delivery Room) ha ki Health Sub Centre kiba don sha Shnong Nongkyndong ka Ri Bhoi ha ryngkat ki bor Solar energy (Climate resilient) ban nym shah ktah ha ka por ba kha khyllung bad ban pynkhlaiñ ïa ka jingsumar ba kyrpang na ka bynta ki khynnah rit.
Ïa kane ka MOU la ïa soi hapdeng u Deputy Commissioner ka Ri Bhoi, u Arpit Upadhayay bad ka Huda Jaffer, Director ka SELCO Foundation ha ryngkat ka jigndon lang u Bah M. Tongper, ADC, U District Medical and Health Officer, Dr P. Kharnarry, ka Additional DMHO, ka Dr B. Blah, bad ki nongmihkhmat na ka Sierra Leone, Ethiopia bad Burkina Faso.
Ka jingthmu ba la ïa soi ïa kane ka MOU ka dei ruh shi bynta ban ai bor ïa ka SELCO Foundation ba kan tei ïa ki 300 tylli kita ki Health Sub Centre ban nym shah ktah ha ba pynthud ka bor mariang ïa ka bording ilektrik kaba kin pyndonkam da ki bor Solar ban pynbiang bording khnang ban nym shah ktah haba thud ka bor mariang.
Haba kren ha kane ka sngi, u Arpirt Upadhayay, Deputy Commissioner ka Ri Bhoi u la pynpaw ka jingkmen ba la dep ban soi ïa ka MOU bad ka SELCO Foundation bad ka jingthmu ba la ïa soi ïa ka MOU ka long ban ai bor ïa ka SELCO Foundation ban shna ïa ki kamra pynkha khun (Maternal Ward) ha ki shnong nongkyngdong kaba dei katkum ka juk stad ba mynta khnang ba kan nym thud na ka bynta ki longkmie kiba wan kha khun sha ki jaka ai jingsumar.
Shuh shuh, u la ong ruh da kaba tei kitei ki kamram kha khun ha ki Health Sub Centre sha ki shnong nongkyndong kaba ki pyndonkam ruh da ka bor solar ban pynbiang bording, kane kan ïarap shibun ban ai ka jingshakri kaba paka tam ïa kiba pang ba shitom bad ruh khamtam ban pynshlur ïa ki Longkmei ban wan kha ïa ki khun sha ki jaka ai jingsumar, u la bynrap.