Soi MoU ka bor District Ri-Bhoi bad ka NETC ban pyndait bording solar ha 3 tylli ki jaka sumar ha Ri-Bhoi

Nongpoh, Nailar 05: Ka bor district jong ka Ri-Bhoi lem bad ka North East Transmission Company Ltd, haka 4 tarik Nailar kila soi da ka Memorandum of Understanding ha ophis u Deputy Commissioner ka Ri-Bhoi naka bynta ban pynkhlaiñ ïaka jingshakri haki jaka sumar haka them Ri-Bhoi bad ban ioh ka bording kaba thikna da kaba pyndonkam da ka solar.
Ïa katei ka MoU la soi hapdeng u Dr. Abhishek Saini Deputy Commissioner ka Ri-Bhoi District bad u Niranjan Rabha, Deputy Manager – Projects, ka NETC, ha kamra treikam u Deputy Commissioner.
Lyngba kane ka sienjam ka NETC kan sa pynbiang bad pyndait ïaka 6KW Solar Power Systems haki 3 tylli ki Sub-Centre ha Ri-Bhoi District lyngba ka skhim CSR ba kynthup ïaka Nongpoh Sub-Centre, Mawlong Sub-Centre bad ka Nongtraw Sub-Centre ba kan nym don shuh ka jingthud ha kaba ïadei bad ka bording khamtam haba ïadei bad ki jaka buh dawai kiba donkam bording lynter.
Naka liang u Dr. Abhishek Saini u la ai ka jingkhublei ba kyrpang ïaka NETC halor katei ka jingkyrshan jong ki lyngba ka skhim CSR, bad kane kan long ka jingkyrkhu bad ka jingmyntoi kaba khraw ïakitei ki jaka sumar khamtam ka Ri-Bhoi ka Aspirational District kaba don ruh ka thong ban dang kyntiew ïaka jingshakri haka tnad ka koit ka khiah.