Shillong, K’lyngkot, 10: Ka tnat Bording jong ka Sorkar Meghalaya ka la ïasnohkti lang bad ka ONGC Tripura Power Company Ltd (OTPC), da kaba soi ïa ka Memorandum of Understanding (MOU) ha kaba la sakhi lang da u Myntri ka tnat Bording u Abu Taher Mondal.
Ha ka jingïalang ïasoi ïa ka soskular kaba la long ha nongbah Shillong, la sakhi lang da u Commissioner and Secretary ka tnat Bording u Sanjay Goyal bad u Managing Director jong ka OTPC u Sanil Namboodiripad.
Kane ka soskular ba la ïasoi na ka bynta lai snem ka dei ka thong jong ki arliang mamla ban pynmih ïa ka bording lyngba ka um ha kane ka jylla.
Ha ka jingïasoi ïa ka soskular la snohkti lang da ka kynhun jong ka OTPC ba kynthup ïa u Chief Commercial Officer (CCO) Arup Ch. Sarmah, u Chief Technical Officer (CTO) u Shree Narayan bad u Head Corporate Affairs (C&M) Mr. Samarjeet Thakur.
U Abu Taher Mondal haba kren ha kane ka jingïalang u la ong, “kane ka jingïatreilang kan kynjoh sha ka thong kaba ngi la angnud, ka dei shaphang ka jingkynshew ïa ka bording bad ka jingïada ruh ïa ka mariang. Ka jingïasoi ïa ka soskular kan long kum u mawmer ban kynshew ïa ka bording, ban plie lynti na ka bynta ka jingpynjyrngam bad ka lawei kaba shngaiñ. Kane ka soskular ka pynpaw ïa ka jingtrei shitom ban pynpaw ïa ka jingdon kyrhai ka jylla Meghalaya ïa ka bording kaba lah ban pynmih na ka um. Ngi thmu ban pynïar ïa ka jingpynmih bording, ban pynthikna ïa ka jingneh kaba slem na ka bynta ki por ki ban dang wan.”
Ka jingthmu jong ka soskular, ka kynthup ïa ka jingtei ïa ka Pump Storage Hydro Power Project, ka jingpynmih ïa ki Large bad Small Hydroelectric Power project, bad ka jingwad lad ban pynbun ïa ki Solar Project.
Kine ki jingthmu ki long kiba yn ïaid ryngkat bad ka pyrthei na ka bynta ban wanrah ïa ka bording kaba khuid bad ban pynkiew ïa ka jingpynmih bording ha ka thaiñ.
